Дырэктар «Паперпрама» Яшчанка: «У канцы 2021 года мы гатовы былі пайсці на павышэнне, але АБФФ зрабіла выбар на карысць «Маладзечна». У цяперашнім фармаце Д3 мы ўперліся ў столь»

Дырэктар і футбаліст «Паперпрама» Кірыл Яшчанка падзяліўся чаканнямі ад цяперашняга сезона каманды ў першай лізе.

– Клуб заяўляў аб гатоўнасці да ўдзелу ў Д2 яшчэ ў 2022, аднак тады нешта не зраслося.

– Зусім дакладна, ужо ў канцы 2021 года мы гатовыя былі пайсці на павышэнне, але АБФФ зрабіла выбар на карысць «Маладзечна», дзеля развіцця футбола ў рэгіёне. Такі выбар быў нам зразумелы. Пазней з'явіўся яшчэ адзін слот пад каманду, але нам занадта позна было прапанавана гэтае месца. Мы ўжо сфарміравалі бюджэт, склад і стратэгію развіцця на 2022 год, таму былі вымушаны адмовіцца.

– Мары спраўджваюцца: у гэтым сезоне вы, нарэшце, прымеце ўдзел у першай лізе. Якія ў вас чаканні на гэты конт?

– Скажу так: у цяперашнім фармаце другой лігі мы ўперліся ў столь. Ніхто з персанала і футбалістаў не прагрэсіраваў так, як гэта павінна быць. Цяпер у нас з'явілася новая матывацыя – магчымасць штотыдзень гуляць з добрымі сапернікамі, расці, з'явілася натхненне, каб даказваць сваю заможнасць на больш высокім узроўні. Таму ўсім, хто мае дачыненне да таго, дзе мы апынуліся, я выказваю вялікую падзяку.

– Якія ў клуба крыніцы фінансавання?

– Нашым генеральным спонсарам з'яўляецца ТДА «Паперпрам», якое вельмі падтрымлівае нас. Акрамя таго, мы самі вядзем камерцыйную дзейнасць і імкнемся выйсці на поўную незалежнасць ад фундатараў.

– Якія мэты вы ставіце перад трэнерскім штабам і камандай у гэтым сезоне?

– Замацавацца ў першай лізе. Заняць не ніжэй за 8 месца па выніках чэмпіянату. У першы год, я лічу, галоўнае – адаптавацца і моцна стаць на ногі, – сказаў Яшчанка.