Дэ Хеа адхіліў прапанову «Аль-Насра». Ён можа перайсці ў «Інтэр» Маямі

Былы брамнік «Манчэстэр Юнайтэд» Давід дэ Хеа да гэтага часу шукае сабе новы клуб.

Як паведамляе Marca, 33-гадовы галкіпер адмовіўся пераходзіць у «Аль-Наср». Саудаўскі клуб прапаноўваў заробак у памеры 500 тысяч фунтаў у тыдзень, але дэ Хеа і яго жонка не лічаць фінансавы аспект ключавым пры выбары новага клуба. Да таго ж, яны не зацікаўлены ў пераездзе ў Саудаўскую Аравію.

У Іспаніі Давідам цікавяцца «Беціс» і «Валенсія», але найбольш верагодным варыянтам працягу яго кар'еры лічыцца «Інтэр» Маямі.

Паведамляецца, што ў падпісанні іспанца зацікаўлены сам Дэвід Бэкхэм. Саўладальнік «Інтэр» Маямі аптымістычна ацэньвае верагоднасць трансферу.

Нагадаем, пасля завяршэння мінулага сезона дэ Хеа пакінуў «Манчэстэр Юнайтэд» і з тых часоў знаходзіцца ў статусе вольнага агента.