«Тотэнхэм» перахапіў у «Барселоны» шведскага цэнтрхава Лукаса Бергвалля, якому сёння споўнілася 18 гадоў

Цэнтральны паўабаронца «Юргордэна» Лукас Бергвалль стане гульцом «Тотэнхэма», паведамляе Фабрыцыа Рамана. 2 лютага гулец святкуе свой 18-ты дзень нараджэння.

Лукас далучыцца да «Тотэнхэма» летам, а наступныя паўгода правядзе ў «Юргордэне», за які выступае з пачатку мінулага года. У сезоне-2023 Бергвалль згуляў 25 матчаў у чэмпіянаце Швецыі, а таксама дэбютаваў у Ліге канферэнцый.

На працягу доўгага часу на Лукаса прэтэндавала «Барселона», швед нават прыбыў у Іспанію, але незадоўга да канца трансфернага акна гулец зрабіў выбар на карысць «шпор». Рамана адзначае, што шведскі вінгер «Тотэнхэма» Дэян Кулушэўскі таксама дапамог пераканаць Бергвалля.

Акрамя таго, англійскі клуб прапанаваў «Юргордэну» больш выгадныя ўмовы. «Барселона» была гатова заплаціць 7 мільёнаў еўра + 3 млн бонусамі, а «Тотэнхэм» дасць 10 млн гарантаваных выплат + бонусы.