Ігар Крывушэнка: «Спарынг з «Мінскам» быў рэпетыцыяй, але ўсё яшчэ можа памяняцца»
Галоўны трэнер БАТЭ Ігар Крывушэнка расказаў пра чаканні ад сезона.
– Перадсезонка, можна сказаць, завершана. Праз тыдзень першы афіцыйны матч. Як праходзіць падрыхтоўка да гульні?
– Згулялі кантрольную сустрэчу з «Мінскам». Група гульцоў правяла спарынг з нашым дублем. Асноўнай задачай было паглядзець, як хлопцы трымаюць нагрузку ўсе 90 хвілін. Магу сказаць, што нам гэта ўдалося.
– Раз мы закранулі гэтую гульню, ці можна сказаць, што ў вас у галаве ёсць гатовы стартавы склад на «Дынама»?
– Канчатковага варыянту пакуль няма. Нейкія моманты ўжо праглядаюцца, сувязі напрацоўваюцца. Спарынг з «Мінскам» быў рэпетыцыяй, але ўсё яшчэ можа памяняцца.
– Гульні з мінскім «Дынама» можна назваць для вас прынцыповымі?
– Не. Гэтулькі часу ўжо мінула. Іншае пытанне, што гэта чвэрцьфінал Кубка, і гэта наша адзіная магчымасць пазмагацца за еўракубкі, — сказаў Крывушэнка.
