Шкурын абʼядноўвае беларусаў: і каму цяжка хадзіць, і з іншых гарадоў, і розных прафесій
Нагода для суайчыннікаў, каб выбрацца на футбол.
Ілля Шкурын працягвае радаваць беларускіх заўзятараў. У пятніцу яго «Сталь» гуляла на выездзе са «Шлёнскім» і дзякуючы голу беларускага нападаючага атрымала мінімальную перамогу – 1:0.
Ва Уроцлаве падтрымаць каманду Шкурына прыйшлі мясцовыя беларусы, сярод якіх хапала вядомых асоб.
Сямён Букін, артыст цырку
Майстар спорту па спартыўнай гімнастыцы вымушана пакінуў Беларусь у канцы 2021-га пасля 15-сутачнага арышту. Цяпер ён працуе ў самым крутым цырку свету – Дзю Салей. 21 снежня 2023-га Букін атрымаў пашкоджанне падчас выступу, а залечваць траўму адправіўся якраз ва Уроцлаў:
«Падчас выступу я так па-дурному пашкодзіў шчыкалатку, калі сыходзіў з перакладзіны. Скруціў яе і парваў дзве звязкі. 5 студзеня я зрабіў аперацыю і цяпер аднаўляюся. Аперацыя прайшла вельмі добра, вельмі ўдзячны гэтай клініцы, хірургу Вітольду Унукевічу<...>», – напісаў у сваім Instagram Букін.
16 лютага, якраз у дзень матча «Сталі» Шкурына, гімнаст яшчэ раз дзякваў медыкам за магчымасць хадзіць на сваіх дваіх. І, падобна, адным з першых месцаў, куды накіраваўся Букін пасля рэабілітацыі, стаў матч Шкурына. Праўда, у момант калі форвард забіваў пераможны мяч, Букін быў у прыбіральні. У выніку самае цікавае гімнаст прапусціў.
Сцяпан Папоў, чэмпіён свету па самба
Самбіст пакінуў Беларусь у жніўні 2021-га. Спачатку накіраваўся ў Турцыю, каб правесці водпуск. Аднак праз магчымыя рэпрэсіі прыняў рашэнне не вяртацца дадому і паехаў ва Украіну. Калі там пачалася вайна, Папоў паехаў у польскі Уроцлаў, дзе і жыве на сёння. Там ён праводзіць трэнінгі па самба, грэплінгу, самаабароне і ММА. Калі раптам захочаце запісацца, то вам па гэтай спасылцы. А яшчэ Папоў падзарабляе ў таксі.
Сяргей Чыстоў, былы футбольны арбітр
Экс-арбітр свой апошні матч у вышэйшай лізе адпрацаваў 30 кастрычніка 2022-га («Нёман» – «Гомель» – 3:0). Паводле яго слоў, прычынай пераезду ў Польшчу стала «становішча навокал» і «пераезды знаёмых». Ва Уроцлаве працуе на вытворчасці і зборцы мэблі.
Ідрак Мірзалізадзе
Стэндап-комік жыве ў Варшаве і, магчыма, падтрымаць Шкурына прыехаў якраз з польская сталіцы. Здаецца, Мірзалізадзе ведае схільнасць футбаліста да непублічнасці і таму, каб лішні раз не ставіць у няёмкае становішча, вырашыў зрабіць вось такое сэлфі:
Дарэчы, у Аляксандра Івуліна ёсць класны выпуск з Ідракам (так, гэты хлопец любіць футбол). Абавязкова паглядзіце, калі не бачылі.
Іншыя пасты карыстальніка
