Не атрымаў разліку ў клубе, пустыя бутэлькі, планы на будучыню. Што вядома на другі дзень пасля смерці Кальцова
Жонка спадзяецца, што гэта быў не суіцыд.
У ноч з 18 на 19 сакавіка былы хакеіст зборнай Беларусі і бойфрэнд тэнісісткі Арыны Сабаленкі Канстанцін Кальцоў загінуў у Маямі пасля падзення з балкона гатэля St. Regis Bal Harbour Resort. У каментары для «Трыбуны» следства назвала тое, што здарылася «відавочным самагубствам».
За мінулыя суткі сталі вядомы новыя акалічнасці гібелі экс-гульца НХЛ, у тым ліку з інтэрв'ю яго былой жонкі Юліі Міхайлавай, якая дала інтэрв'ю «Зеркалу».
Жыў на 23-м паверсе, меў іншае забраніравае жыллё
Кальцоў спыніўся на 23-м паверсе гатэля St. Regis Bal Harbour Resort, што ў гадзіне язды ад дома, у якім жывуць яго жонка і трое сыноў (да кортаў, на якіх пройдзе турнір Miami Open з удзелам Арыны Сабаленкі, усяго 17 км). Паводле інфармацыі партала Booking.com, нумар на суткі ў гатэлі можна зняць для аднаго або двух чалавек за кошт ад 1182 да 3258 долараў.
Юлія, былая жонка Кальцова, кажа, што ў яго былі забраніраваныя апартаменты ў іншым месцы, аплачаныя пакупкі і надоўга арандаваная машына (даведалася пра гэта праз электронную пошту нябожчыка, да якой мае доступ), а таксама ў планах была вячэра з дзецьмі. Таму жанчына лічыць, што Кальцоў не збіраўся здзяйсняць суіцыд.
У нумары былі пустыя бутэлькі з-пад алкаголю
Юлія схіляецца да версіі, што смерць Кальцова – няшчасны выпадак, які мог адбыцца праз злоўжыванне алкаголем. Калі жанчына прыехала на месца трагедыі, то пабачыла ў нумары, дзе ёсць балкон з відам на Атлантычны акіян, пустыя бутэлькі ад спіртнога. Яна выказвае здагадку, што былы муж мог быць моцна пʼяным (маўляў, такое здараецца ў былых хакеістаў), але афіцыйных вынікаў аналізаў пакуль няма - яны будуць гатовыя толькі праз месяц.
Юлія мяркуе, што Кальцоў проста «мог не ўсачыць за сваімі дзеяннямі».
Спадкаемцам стане старэйшы сын
У Кальцова засталося трое сыноў: 18-гадовы Данііл, 16-гадовы Аляксандр і 5-гадовы Стэфан. Усе яны ўжо ведаюць пра смерць бацькі, але малодшаму не раскрывалі абставінаў інцыдэнта.
Паводле былой жонкі, спадкаемцам у ЗША лічыцца старэйшы сын. Таму Даніілу давядзецца ездзіць па ўсіх пытаннях, звязаных з гібеллю яго бацькі, каб афармляць неабходныя дакументы.
Толькі ў НХЛ Кальцоў зарабіў больш за 1,5 мільёна долараў, але гэта лічба да сплаты падаткаў.
Цела Кальцова даставяць у Беларусь
Спачатку пра гэта паведаміў першы трэнер Кальцова Уладзіслаў Астапенка. Гэтую інфармацыю пацвердзіла і экс-жонка энхаэлаўца, якая як раз збірае дакументы для транспарціроўкі нябожчыка ў Мінск.
Звольніўся з «Салавата» пасля размовы на павышаных танах
У апошнія дні жыцця ў Кальцова, па паведамленнях крыніц, здарылася пара непрыемных сітуацый. Першая – звальненне з «Салават Юлаева», дзе той адпрацаваў два гады асістэнтам галоўнага трэнера. Як паведамляе «Матч ТВ», Кальцоў пакінуў уфімскі клуб у выніку размовы на падвышаных танах са спартыўным кіраўніцтвам пасля вылету ў першым раўндзе Кубка Гагарына, дзе саступілі ў серыі «Трактару» 2:4. Спецыяліст нібыта напісаў заяву на звальненне па ўласным жаданні, якую ў клубе задаволілі, пры гэтым з ім не змаглі разлічыцца па грошах, бо «Салават» цяпер перажывае фінансавыя праблемы і мае сур'ёзныя даўгі.
Пры гэтым прамога канфлікту з кім-небудзь у Кальцова не адбылося, а ў хакейных колах хадзіла інфармацыя пра яго магчымае прызначэнне на пасаду галоўнага трэнера мінскага «Дынама».
Нібыта адбыўся сямейны канфлікт
Першы трэнер Кальцова расказаў, што напярэдадні гібелі Кальцоў з кімсьці пасварыўся з сям'і:
– Ён пасварыўся, гэта сямейная сітуацыя. Я сам не магу зразумець, вельмі складана, цяжка зараз, – сказаў Астапенка.
З гэтых словаў не вынікае, з кім былы хакеіст не знайшоў паразумення – ці то з новай дзяўчынай, ці то з былой жонкай. Апошняя, прынамсі, кажа, што з Кальцовым апошнім часам камунікавала вельмі мала, бо кожны будаваў уласнае жыццё.
Іншыя пасты карыстальніка
