Беларуса паднялі з фарма ў НХЛ – і той дапамог абгуляць фаварыта. Абаронцу трэба напрацаваць на новы кантракт
Шанс для Калячонка.
Па стане на 11 красавіка ў заяўках клубаў НХЛ значацца чатыры беларускія хакеісты. Разам з «Вашынгтонам» за пуцёўку ў плэй-оф змагаецца Аляксей Протас. У «Калгары» б'е рэкорды выніковасці сярод беларусаў у НХЛ Ягор Шаранговіч, там жа спрабуе замацавацца Ілля Салаўёў:
І вось у ноч в серады на чацвер «Арызона» другі раз за сезон падняла з фарма Уладзіслава Калячонка. Вяртанне атрымалася звышудалым – гулец выйшаў на лёд супраць «Ванкувера» у трэцяй пары з Джошуа Браўнам, асіставаў таму пры першым голе, а затым вызначыўся і сам:
У выніку за гульню ў Калячонка 2 (1+1) пункты, «+2» карыснасць за 10:51 гульнявога часу. Усяго за кар'еру ў НХЛ гулец мае 5 (2+3) балаў у 36 матчах.
Варта адзначыць, што «Арызона» практычна ніякіх турнірных задач ужо не вырашае. «Каёты» размяшчаюцца на 13-м месцы – ніжэй яны не ўпадуць, ды і вышэй наўрад ці паднімуцца (у 12-га «Калгары» Шаранговіча і Салаўёва 3 пункты перавагі і два матчы ў запасе). А вось «Ванкувер» усё яшчэ захоўвае шанцы на перамогу ў рэгулярцы, праўда, параза ад «Арызоны» іх значна паменшыла.
Але вяртаемся да Калячонка. У гэтым сезоне, да пераможнай гульні з «Ванкуверам», абаронца правёў за «Каётаў» адзін матч, які скончыўся няўдала – 26 лістапада, правёўшы на пляцоўцы 6:09 у матчы з «Вегасам» (2:0), гулец патрапіў пад сілавы прыём Джонатана Маршэса, пасля чаго не змог працягнуць гульню і, кульгаючы, адправіўся ў распранальню. Аднавіўся Калячонак толькі праз два з паловай месяца – 10 лютага згуляў за фарм «Арызоны» «Тусан» у АХЛ:
Да траўмы беларус паспеў згуляць за «Тусан» у сезоне 12 матчаў, дзе набраў 3 (2+1) пунктаў, зарабіў шэсць хвілін штрафу і паказнік карыснасці «+5». Пасля вяртання хакеіст ужо адкатаў 23 сустрэчы, у якіх набраў 8 (6+2) пунктаў, зарабіў дзевяць хвілін штрафу і паказнік карыснасці «-3».
Самым яркім пасля вяртання на ўзроўні АХЛ для беларуса атрымаўся лютаўскі матч з «Бэйкерсфілд Кандорс» (2:3). У ім Калячонак вызначыўся галявым дублем і быў прызнаны другой зоркай сустрэчы:
Гэты сезон ужо стаў самым выніковым па закінутых шайбах для Калячонка ў АХЛ (8). Да гэтага максімум было чатыры дакладныя кідкі за 74 гульні ў мінулым сезоне. А яшчэ Калячонак быў блізкі, каб паставіць снайпэрскі рэкорд для беларускіх абаронцаў у АХЛ. На гэты момант рэкордныя паказнік належыць Алегу Мікульчыку і Раману Грабарэнку – абодва закінулі па 9 шайб. Першаму для гэтага спатрэбілася 67 гульняў у сезоне-1993/1994, а другому – 47 у сезоне-2014/2015. Але ў Калячонка яшчэ можа з'явіцца магчымасць як мінімум дагнаць суайчыннікаў, нават калі ён дагуляе сезон у НХЛ – «Тусон» гарантаваў сабе месца ў плэй-оф АХЛ.
Кантракт Калячонка з «Арызонай» заканчваецца ў канцы бягучага сезона. У прынцыпе, сітуацыя гульца падобная на тую, у якой знаходзіцца Салаўёў у «Калгары» – «Каёты» гэтак жа турнірных задач не вырашаюць, таму вызначаюцца, з кім ісці ў наступны сезон. Вось толькі матчаў давесці сваю прыдатнасць у Калячонка менш, чым у яго суайчынніка з «Флэймз» – дзве сустрэчы з «Эдмантанам» і вочная гульня з «Калгары». Але калі ён будзе гуляць гэтак жа, як з «Ванкуверам», то «Арызона» цалкам можа прапанаваць новае пагадненне.
Іншыя пасты карыстальніка
