Кіраўнік Special Olympics: «Гэта велізарная, жудасная трагедыя, што на спаборніцтве няма спартсменаў з Расіі і Беларусі, але яна нязначная ў параўнанні з маштабамі вайны»

Кіраўнік Special Olympics Цімаці Шрайвер пракаментаваў нядопуск расіян і беларусаў да Сусветнай Спецыяльнай Алімпіяды.

Special Olympics – міжнародная арганізацыя, якая займаецца пытаннямі арганізацыі спартыўных мерапрыемстваў для асоб з разумовымі адхіленнямі.

«Гэта было не нашае рашэнне. Гэтае рашэнне выклікае шкадаванне. Вайна – гэта трагедыя надзвычайных і неверагодных маштабаў.

Гэта месца для міру, месца, якое вучыць міру. Мы верым у ветлівасць, павагу і годнае стаўленне да людзей незалежна ад іх паходжання, культуры, рэлігіі, расы ці колеру скуры.

Вайна – гэта супрацьлегласць гэтаму, гэта перакананне, што мы павінны забіваць людзей.

Гэта вялізная, жудасная трагедыя, што тут няма нашых спартсменаў з Расіі і Беларусі, але яна нязначная ў параўнанні з маштабамі вайны, і яна адказвае толькі нашай рашучасці ўнесці свой маленькі ўклад, каб паспрабаваць пакласці канец гэтаму», – сказаў Шрайвер.

Сусветная спецыяльная Алімпіяда праходзіць зараз у Берліне і прадоўжыцца да 25 чэрвеня.