Селімаў пра мірныя пратэсты беларусаў у 2020-м: «Мне было страшна, калі ляцелі банкі, склянкі і кактэйлі Молатава. І гэтыя страшныя натоўпы»

Кіраўнік беларускай федэрацыі барацьбы Алім Селімаў падзяліўся меркаваннем аб сітуацыі ў Беларусі і свеце.

Нагадаем, з 24 лютага 2022 году Расія працягвае вайну ва Украіне з выкарыстаннем тэрыторыі Беларусі.

– У апошнія тры гады на планеце і ў нашым рэгіёне адбываюцца жудасныя рэчы. Ковід, палітычны ціск на нашу краіну, асабліва ў 2020-м годзе (9 жніўня 2020 года Аляксандр Лукашэнка фальсіфікаваў вынікі выбараў прэзідэнта – Tribuna.com), а потым яшчэ дадалася і спецыяльная ваенная аперацыя (так супрацоўнікі дзяржСМІ называюць вайну ва Украіне – Tribuna. com). Як у такім свеце, калі інфармацыя і падзеі цябе раздзіраюць на часткі, не страціць сябе?

– Давайце адыдзем у гэтым пытанні да выхавання, каштоўнасцяў, адданасці блізкім. Усё ідзе ад сям'і. Гісторыя вучыць таму, што жыццё падкідвае нам выпрабаванні і выбар.

Не бывае так, каб 200 гадоў чалавецтва жыло ў міры і згодзе. Пасля Вялікай айчыннай вайны наступіла лядоўня. Цяпер гэты ціск калектыўнага Захаду. Былі і бамбардзіроўкі Блізкага Усходу для сваіх эканамічных і геапалітычных мэт. Давайце ўспомнім Югаславію. А сёння расхістаць сітуацыю тут, каб дагадзіць сваім амбіцыям, не атрымалася.

Вось Кадафі (дыктатар, які захапіў уладу ў Лівіі ў 1969 годзе, быў забіты ў 2011-м – Tribuna.com) будаваў канал арашэння ўсёй Афрыкі, і, калі б кантынент азелянеў, страціла б у гэтым толькі Амерыка. Ім трэба было гэтага не дапусціць, кінуўшы запалку разладу ў Лівію, нацкаваць сябар на сябра людзей. Тое, што зараз спрабуюць зрабіць ва Украіне. І навязаць свае ідэі і правілы. Але ёсць два чалавекі ў свеце, гэта прэзідэнты Беларусі Аляксандр Лукашэнка і Расіі Уладзімір Пуцін, якія дакладна далі зразумець, што так не пойдзе.

А спартсмены-змагары былі верныя сабе. Гэта рыса характару. Возьмем мой прыклад, каб не хадзіць далёка. Я прыехаў у Беларусь, мяне выхавалі беларусы, зарабляў і атрымліваў даброты ад беларускай дзяржавы. І ўсё гэта рабіў паводле закону краіны, у якой можна добра і нябедна жыць, уладкоўвацца, працаваць. І атрымліваць вынік і ў плане фінансаў, і ў плане павагі і стаўлення людзей.

А тут з'яўляецца нейкі чалавек, які спрабуе сказаць, што вы няправільна жывёце. Маўляў, прыйдзе новая ўлада і вы будзеце атрымліваць, умоўна, не 100 рублёў, а атрымаеце 500. Але адкуль? І ў выніку мы падтрымалі нашага прэзыдэнта. Мы змаглі выстаяць той год.

Хаця бачыў гэты бардак, які адбываўся пад маімі вокнамі. І мне было страшна, калі ў супрацоўнікаў правапарадку (верагодна, мае на ўвазе сілавікоў Лукашэнку, якія збівалі беларусаў у тым ліку і ў 2020 годзе – Tribuna.com) ляцелі банкі, склянкі і кактэйлі Молатава. І гэтыя страшныя натоўпы... (верагодна, Селімаў мае на ўвазе мірныя пратэсты беларусаў, якія не былі згодныя з фальсіфікацыяй прэзідэнцкіх выбараў-2020 – Tribuna.com). Ну, як, гледзячы на тое, што адбываецца, можна пераабуцца? – сказаў Селімаў.