Кікбаксёр Ганін: «Ведаю, што петыцыі і лісты не спыняць вайну і кровапраліцце, але веру, што сумарна ўсе антываенныя ініцыятывы паскораць перамогу дабра над злом»
Беларускі кікбаксёр Іван Ганін распавёў, чаму падпісаў Антываенную дэкларацыю Беларускага фонда спартовай салідарнасці.
Нагадаем, што дэкларацыю падпісалі ўжо болей за 100 прадстаўнікоў спорту не толькі з Беларусі, але і з іншых краін: Украіны, Славеніі і Расіі.
«Са жніўня 2020 года я выказваю сваю нязгоду з тым, што адбываецца ўнутры маёй краіны. Шмат усяго адбылося за апошнія паўтара гады. Маё жыццё і маё мысленне вельмі моцна змяніліся. Мне сорамна, што многія рэчы і падзеі я прапускаў праз пальцы. За гэта мы ўсё і паплаціліся. Здавалася, што ўжо мала што магло «здзівіць». Нават прабіццё чарговага «дна» стала штодзённым.
Але 24 лютага ўсё памянялася. Жахі, якія мы адчулі, выйшлі на новы ўзровень і памножыліся ў некалькі разоў. Адна суседняя дзяржава напала на іншую. Фашызм прыйшоў праз 77 гадоў зусім з іншага боку. А з тэрыторыі маёй краіны да гэтага часу ляцяць ракеты па брацкаму народу. Купка бандытаў, якія захапілі ўладу ў Беларусі, гатовая на ўсё, абы «дзень прастаяць ды ноч пратрымацца».
У мяне няма ніякіх ілюзій, хто ёсць зло.
Я ведаю, што петыцыі і лісты не спыняць вайну і кровапраліцце, але веру, што сумарна ўсе антываенныя ініцыятывы паскораць перамогу дабра над злом. Менавіта таму я падпісаў Антываенную дэкларацыю.
Для мяне таварыства падзялілася на людзей і фашыстаў. І, паводле беларускага вопыту, спісы вельмі дапамагаюць даведацца, хто ёсць хто насамрэч. Варыянту «пасярэдзіне» ужо няма. За спартсменаў, якія асуджаюць вайну, трэба змагацца. А маўклівых ніхто не выцягне», – прыводіць словы Ганіна БФСС.