Былы беларускі топ-арбітр ашалеў падчас матча аматараў: накаўтаваў падлетка – і атрымаў бан ад лігі (раней яго каралі па справе аб дамоўных гульнях)
Зараз трэнiруе дзяцей.
Станіслаў Савіцкі ў пачатку 2000-х уваходзіў у кагорту лепшых арбітраў краіны: у 2003-м атрымаў статус памочніка рэферы ФІФА, абслугоўваў гульні групавога этапа Лігі Еўропы, а таксама фінальныя раунды юнацкіх чэмпіянатаў Еўропы. У 2006-м атрымаў прызнанне ад АБФФ, калі ўвайшоў у брыгаду найлепшых арбітраў краіны па выніках года (узначаліў яе вядомы Сяргей Шмолік), але пасля сканчэння кар'еры ўспаміналі пра яго не дужа часта.
Ідэйны натхняльнік самай зорнай аматарскай каманды краіны (за «Захад-3» у розны час пайгралі Аляксандр Хацкевіч, Ігар Кавалевіч, браты Глебы, Ігар Стасевіч і вялікая колькасць іншых зорак белфутбола) у 2017-м нечакана выявіўся ў спісе датычных да дамоўных матчаў.
Следчым камітэтам Савіцкі быў пазней пераведзены ў статус сведкі, але двухгадовы бан ад федэрацыі былы арбітр атрымаў – ён падзяліўся нумарам футбаліста «Ашмянаў» з адным з арганізатараў дамоўных гульняў.
«Я праходжу па справе ў якасці сведкі, да мяне прэтэнзій з боку праваахоўных органаў няма. Чаму маё прозвішча апынулася ў спісе? Я не ведаю. Якая мая роля? Проста меў неасцярожнасць па тэлефоне звесці двух людзей адзін з адным, калі ў мяне папрасілі кантакты», – пракаментаваў Савіцкі.
У футболе экс-суддзя ўсё ж застаўся: да гэтага часу займаецца «Захадам-3», з якім стаў сёлета чэмпіёнам вышэйшай лігі АЛФ (найбуйнейшай аматарскай лігі Мінска), а таксама трэніруе дзяцей у сталічных школах «Арсенал» і «Фрунзенец» . З нядаўніх часоў Савіцкі вярнуўся і ў судзейскую сферу - працуе інспектарам на матчах другой лігі.
Новы скандал з удзелам экс-арбітра здарыўся як раз у АЛФ, але не з «Захадам-3», а з «Фрунзенцам» – 15-гадовыя гульцы, умацаваныя некалькімі дасведчанымі партнёрами, у лік якіх уваходзіць і Савіцкі, выступаюць у тамтэйшай міні-футбольнай лізе. Супернікам «Фрунзенца» ў чарговым туры чэмпіянату стала каманда яшчэ адной прыватнай (яе заснаваў заслужаны трэнер краіны Юрый Пышнік) футбольнай сталічнай школы – «Фаварыт», у складзе якой выступаюць у асноўным 16-годкі.
Пачалося ўсё з эпізоду ў цэнтры поля (лік на той момант быў не на карысць «Фрунзенца» – 3:8), калі двое гульцоў «Фаварыта» заціснулі ў «скрыначку» Савіцкага і той упаў на паркет. Былы суддзя пачаў нешта вымаўляць аднаму з крыўдзіцеляў, а прабачэнні ад другога яго не супакоілі. Узняўшыся з падлогі, ён пульнуў мяч у бок аднаго з гульцоў і зарабіў кутні – суддзі (працавалі на матчы дзве дзяўчыны), мабыць, вырашылі, што ён так разгуляў зароблены штрафны.
Сам жа Савіцкі і накіраваўся кутні разыгрываць і там ужо канчаткова зляцеў са шпулек: пасля таго, як яго жорстка, але ў межах правіл сустрэў супернік, ён ударыў таго кулаком у галаву – юнак паваліўся на паркет, а былы арбітр схіліўся над ім, ці то з жаданнем дабіць, ці то каб нешта растлумачыць, але своечасова падаспела адна з суддзяў, якая адштурхнула «байца». З лаўкі «Фаварыта» выскачыў нехта з трэнерскага штаба, і паміж ім і Савіцкім адбылася невялікая бойка – экс-арбітр другі раз за хвіліну апынуўся ў ляжачым становішчы.
Да канца матчу «Фаварыт» вызначыўся яшчэ двойчы і давяршыў разгром (10:3), а ліга на дзеянні Савіцкага адрэагавала працяглай дыскваліфікацыяй: інспектар атрымаў 10-матчавы бан і ўмоўнае пакаранне да канца чэмпіянату.