«Віцебск» усё ніяк не заляціць у топ-3 Д2: памылкі абароны выліліся ў разгром ад лідара лігі «Арсенала»
Апошні гол як той фарт, якога зборнай не хапае.
Вышэйшая ліга падчас міжнародных матчаў сышла на паўзу, затое дывізіён рангам ніжэйшы спакойна сабе жыве. І ў мінулыя выходныя там адбылася падзея, якая заслугоўвала ўвагі: 9 верасня ў 23-м туры гулялі «Арсенал» і «Віцебск», 1-е і 4-е месца ў табліцы.
Гульня мела важнае значэнне для віцьбічаў: пасля няўпэўненага старту каманда, якая сваёй мэтай ставіць вяртанне ў Д1, усё ніяк не можа патрапіць і замацавацца ў топ-3. Нагадаем, у вышэйшую лігу наўпрост выходзяць першае і другое месца, трэцяя каманда згуляе ў стыках з 14-м месцам «вышкі». Але навязаць нейкую барацьбу лідару чэмпіянату ў падапечных Аляксандра Паўлава зусім не атрымалася.
Першы мяч у браму «Віцебска» заляцеў ужо на чацвёртай хвіліне – цэнтральныя абаронцы чамусьці пакінулі без увагі Альберта Міхайлава:
На сыходзе 32-й хвіліны 19-гадовы Арсень Агееў на хуткасці адыграўся з Андрэем Леўкаўцом і тым жа Міхайлавым і разарваў абарону «паўночнікаў»:
Праз хвіліну Агееў зрабіў тое ж самае, але гэтым разам Дзмітрый Харытонаў стрэл пацягнуў:
У другім тайме, на 51-й хвіліне Міхайлаў зрабіў дубль – яго зноў не ўтрымалі цэнтральныя абаронцы:
На 64-й хвіліне «Віцебск» нарэшце мог адкрыць лік, але Арцём Сарока пацягнуў два ўдары расіяніна Вадзіма Ткачэнкі з вельмі блізкай дыстанцыі:
А праз трынаццаць абаротаў стрэлкі паўабаронца «паўночнікаў» Яўген Красноў з добрай пазіцыі пальнуў па таварышу:
У самым канцы матчу Агееў зноў накруціў абарону віцяблян і пацэліў у вароты. Здавалася, што Харытонаў уратаваў, але ад яго рукі мяч упаў у браму – ну што за няфарт!
0:4 – разгромная параза пакінула «Віцебск» на чацвёртым месцы першай лігі. Да візіту да «Арсеналу» каманда не прайгравала ў Д2 13 матчаў запар – ажно з 20 траўня. Затое ў апошніх трох турах віцьбічы ўвогуле ні разу не забілі. Таму ўсяго адна параза на гэтым адрэзку – не так ужо і дрэнна.
«Віцебск» мае гульню ў запасе, але пасля нядзельнай перамогі «Дняпра» над «Нівай» (2:1) магілёскі клуб апярэджвае «паўночнікаў» на тры пункты. Вось як выглядае топ-5 першай лігі на дадзены момант:
1. «Арсенал» – 57 пунктаў (22 матчы)
2. «Лакаматыў» – 50 (22)
3. «Дняпро» – 45 (22)
4. «Віцебск» – 42 (21)
5. «Макслайн» – 40 (21)
Да канца першай лігі-2023 застаецца 10 тураў. Ці здолее «Віцебск» выправіць становішча?