Папрокі раздражняюць «Дынама»: са Скрыпчанкі палез сарказм, у каментарах клуб апусціўся да пагроз
«Пакаленне стукачоў»?
26 лістапада мінскае «Дынама» датэрмінова аформіла чэмпіёнства, абгуляўшы ў перадапошнім туры чэмпіянату Беларусі «Белшыну». Але не ўсе аматары футбола парадаваліся гэтаму нават з ліку тых, хто яшчэ не нядаўна заўзеў за клуб. Пра гэта людзі пісалі ў каментарах пад пастамі ў спартовых пабліках. А некаторя прыйшлі са сваім меркаваннем і ў афіцыйныя акаўнты мінскага «Дынама».
У ticktok-акаўнце бела-блакітных здарылася незвычайная сітуацыя. Адзін з карыстальнікаў сацсеткі рэзка заявіў, што чэмпіёнства «Дынама» здарылася дзякуючы суддзям і па ўказцы Лукашэнка (менавіта яго часта з сарказмам называют «крэпкім хазяйственікам»). У адказ ад прадстаўніка клуба, які вядзе акаўнт, прагучала пагроза.
Гэта не адзіны каментар пад відэа, у якім карыстальнікі пісалі пра ўплыў судзейства на чэмпіёнства «Дынама», але іншыя меркаванні альбо ігнараваліся, альбо адказ быў у іншым стылі.
Варта зазначыць, што судзейскіх скандалаў у матчах «Дынама» амаль не было, іншая справа, што адміністратыўнымі метадамі быў разбураны склад БАТЭ, а «Шахцёр» пацярпеў за свае махінацыі.
Вельмі падобна, што камусьці ў клубе надакучыла адказваць на кпіны і папрокі, бо крыху пазней з'явіўся пост з заклікам не стрымліваць сябе ўсім тым, хто піша пра суддзяў, БАТЭ і іншае.
Прыкладна адразу пасля чэмпіёнства ў адпаведным духу пра крытыку выказаўся і галоўны трэнер «Дынама» Вадзім Скрыпчанка - саркастычна падзякаваў незадаволеным, хаця ў тоне спецыяліста чуваць раздражненне.
