Найгоршы злодзей краіны: неверагодныя прыгоды футбольнага фаната
У апошні час асаблівая ўвага СМІ накіравана на футольных фанатаў. У гэтым матэрыяле сабраныя неверагодныя фанацкія прыгоды, з мэтай паказаць, што менавіта футбольны фанат - найгоршы злодзей Беларусі.
Аўтар жартоўнага Twitter-акаўнта @_FloridaMan збірае ўсе загалоўкі навін, дзе ёсць выраз «Florida Man» — «жыхар Фларыды». Так вызначаюць героя артыкула, калі не атрымліваецца апісаць яго дакладней.
У нас таксама можна сустрэць загалоўкі з прывязкай да месца жыхарства герояў ці да іх сацыяльнага статусу і прафесіі. У апошні час асаблівая ўвага накіравана на футбольных фанатаў. У гэтым матэрыяле адабраныя навіны, дзе паведамляецца пра неверагодныя фанацкія прыгоды з мэтай паказаць, што менавіта футбольны фанат – найгоршы злодзей Беларусі.
Паскудзіць па ўсёй Беларусі
Футбольны фанат робіць свае злачынствы паўсюль: ад Мазыра, дзе наш «супергерой» распаўсюджваў ролікі для дарослых, і да Наваполацка – там у ход пайшла не толькі «клубнічка», але і псіхатропы. Дарэчы, каб гучна нашкодзіць на Віцебшчыне, злодзею спатрэбіліся гады, цягам якіх ён паступова зарабляў аўтарытэт: нюхаў клей, ужываў алкаголь у грамадскіх месцах, а таксама ўдзельнічаў у бойках.
Толькі за гэты год фанат адзначыўся ў Брэсце, Кобрыне, Гомелі, Слуцку, Жыткавічах, Віцебску, Рэчыцы, а ў Мінску нават не аднойчы. Масштабы дзівяць і бянтэжаць – будзьце асцярожнымі і не адчыняйце дзверы незнаёмым, у наступны раз ён можа з’явіцца ў вашым горадзе.
Дзейнічае не адзін
Часам свае злачынствы злодзей робіць не адзін. У траўні зламыснік разам са знаёмымі запрасіў да сябе ў госці жыхара Гомеля. Гамяльчаніна чакаў «цёплы» прыём – спачатку яго пабілі, потым знялі з яго адзенне, звязалі і размалявалі цела фашысцкімі свастыкамі. Гэта было не ўсё – потым у такім выглядзе няшчаснаму прышлося бегаць па вуліцах.
А ў кастрычніку злодзей адпачываў з сябрамі ў адным з бараў. Перад закрыццём установы нешта пайшло не па плане. Канфлікт паміж нашымі героямі вызваліся вырашыць двое іншых наведвальнікаў. І дарма – у выніку ўсё вылілася ў збіццё гэтай пары. Адзін з удзельнікаў бойкі нават пырснуў у твары ахвярам слезатачывы газ. І вы ўжо здагадаліся, хто гэта быў.
Валодае псіхалагічнымі прыёмамі
Для сваіх злачынстваў футбольны фанат выбірае розныя методыкі. Адна з улюбёных – псіхалагічны прэсінг. Летам злодзей падгаварыў дзяўчынку збіць сваю аднагодку-цыганку. У выніку псіхалагічнага ціску паміж дзецьмі адбылася бойка.
У лістападзе зламыснік вярнуўся да свайго прыёма – двух малазнаёмых таварышаў ён паспрабаваў абвінаваціць у тым, што тыя паламалі ягоны тэлефон, за што павінны былі аддаць 2 мільёны рублёў. З цягам часу сума вырасла ў два разы.
Застаецца няўлоўным
Нягледзячы на тое, што з’яўляецца інфармацыя аб затрыманні галоўнага злодзея Беларусі, прыгоды футбольнага фаната працягваюцца. Ніхто не ведае, як ён выглядае і колькі яму гадоў. Сярод затрыманых, якіх выдавалі за сапраўднага злодзея, былі як непаўналетнія, так і дарослыя. Як беспрацоўныя, так і спецыялісты ў розных сферах.
Галоўны зламыснік Беларусі на волі – ён можа наведаць студэнцкі інтэрнат і збіць замежнага студэнта, зрабіць тое ж самае з суседам за просьбу зрабіць музыку цішэй, а можа, ён зараз перадае камусьці наркотыкі. Будзьце пільнымі, магчыма ён – гэта вы!