У БАТЭ і «Дынама» – «абмен» гульцамі фланга: абодва могуць дзейнічаць у стылі Рабэна і ў сезоне-2023 канфліктавалі з трэнерамі
І агент у іх адзін на дваіх.
На днях мінскае «Дынама» і БАТЭ зрабілі своеасаблівы «абмен» гульцамі, якія выступаюць на падобных пазіцыях. Дзмітрый Падстрэлаў, які ў мінулым сезоне выступаў за Барысаў, заключыў 2-гадовы кантракт са сталічным клубам, а экс-дынамавец Алег Нікіфарэнка падпісаўся з «жоўта-сінімі» да канца 2024-га. Абодва ў мінулым сезоне канфліктавалі з трэнерамі, абодва могуць дзейнічаць у стылі Рабэна і абодва супрацоўнічаюць з агентам Яўгенам Гайдуком.
Расказваем, чым Падстрэлаў і Нікіфарэнка могуць быць карысныя новым камандам.
Алег Нікіфарэнка, 22 гады
У абойму Вадзіма Скрыпчанкі паўабаронца ўваходзіў цягам першага круга-2023: чатыры разы зʼявіўся ў стартавым складзе, а за 12 матчаў аформіў 2+2 па «гол+пас», праводзячы ў сярэднім на полі 36 хвілін.
Пасля летняга вылету «Дынама» з еўракубкаў у Нікіфарэнкі сапсаваліся стасункі з галоўным трэнерам. Прычына – незадаволенасць малой колькасцю гульнявога часу, якая выяўлялася ў тым, што футбаліст недапрацоўваў на трэнінгах. Скрыпчанка спадзяваўся, што Нікіфарэнка зменіць стаўленне да працы, але да вяртання ў склад справа не дайшла. Апошні матч за «Дынама» паўабаронца правёў яшчэ ў ліпені 2023-га, пасля чаго толькі тройчы трапляў у заяўку, але на поле не выходзіў. Пасля заканчэння сезона пакінуў клуб свабодным агентам.
Нікіфарэнка зʼяўляецца тыповым прыкладам інвертаванага вінгера – крайняга паўабаронцы, які гуляе на «чужым» для сябе флангу (праўша – на левым, ляўша – на правым). Такі футбаліст павінен мець высокую хуткасць, нестандартнае мысленне, дрыблінг і пастаўлены ўдар. За ўзор можна ўзяць Арьена Рабэна і Франка Рыберы часоў «Баварыю», але ж і навічок БАТЭ таксама здольны сёе-тое падаць з неабходных якасцяў.
Ён не баіцца абыгрываць і актыўна бяжыць наперад, імкнучыся адшукаць свабодную прастору паміж абаронцамі. Для ілюстрацыі пасуе гол у вароты «Энергетыка-БДУ» у сезоне-2021, што быў забіты яшчэ за «Рух». Дзяніс Лапцеў павёў на кут штрафной цэнтральнага абаронцы, а ў вызваленую зону з флангу ўбег Нікіфарэнка – і праз імгненне расстраляў галкіпера «студэнтаў».
Уменне знаходзіць прастору для сябе ў чужой абароне Нікіфарэнка прадэманстраваў годам раней, калі выдатна прапанаваў сябе паміж крайнім і цэнтральным абаронцамі «Слуцка».
Збліжаючыся з галкіперам, Нікіфарэнка больш нацэлены біць сам, чым аддаваць перадачу. Вінгер шукае шчасця нават з вострага кута – і ў гэтым яму дапамагае як раз працоўная правая нага, якая пасля ўварвання ў штрафную злева ідэальная для ўдару ў далёкі кут.
Уменне завяршаць атакі такім чынам Нікіфарэнка дэманстраваў і ў моладзевай зборнай (адзнака 5:01).
Немалаважная якасць Нікіфарэнкі наперадзе – тое, што ён дагульвае моманты да канца. Упартасць не раз прыносіла яму выніковыя балы. Менавіта Нікіфарэнка восенню 2022-га скарыстаўся памылкай Данілы Сокала і прынёс «Іслачы» перамогу з мінімальным лікам над «Славіяй».
У іншым падобным па сутнасці выпадку Нікіфарэнка прынёс мінскаму «Дынама» перамогу ў вясновым класіка-2023. Паўабаронца да апошняга адпрацаваў у эпізодзе з мячом, які завіс над барысаўскай штрафной, і скарыстаўся хібай Андрэя Кудраўца на выхадзе.
Яшчэ адна важная опцыя інвертаваных вінгераў – сыходы з флангу ў цэнтр і ўдары адтуль зручнай працоўнай нагой. Нікіфарэнка здольны на такія манеўры, што і прадэманстраваў у матчы з моладзеўкай Ліхтэнштэйна (адзнака 10:06).
Навічок можа спатрэбіцца Ігару Крывушэнку і пры стандартах. Да прыкладу, у «Іслачы» Нікіфарэнка падаваў кутнія. Адзін з іх нават завяршыўся прамым голам у вароты «Арсенала».
Калі галоўны трэнер БАТЭ не зменіць для Нікіфарэнкі пазіцыю, то падпісанне футбаліста бачыцца заменай Арцёму Канцавому, які ўжо адной нагой знаходзіцца ва «Урале».
Таксама з намінальных левых паўабаронцаў у складзе Барысава на сёння ёсць Мікіта Някрасаў і нядаўна падпісаны з «Гомеля» Андрэй Патапенка.
Дзмітрый Падстрэлаў, 25 гадоў
Дынамаўскі навабранец таксама зʼяўляецца інвертаваным вінгерам, але дзейнічае на супрацьлеглым ад Нікіфарэнкі флангу. Першую палову 2023-га ляўша Падстрэлаў правёў у «Каспіі», дзе стабільна гуляў у старце, але захацеў сысці пасля таго, як кіраўніцтва клуба прапанавала перазаключыць кантракт з паніжэннем заробку. На гэта легіянер не пагадзіўся і ў ліпені 2023-га стаў свабодным агентам. Агулам за каманду з зоны вылету ён правёў 13 матчаў і набраў 2+2.
У тым жа месяцы вінгер падпісаўся з БАТЭ. За астатнюю частку сезона Падстрэлаў ўзяў удзел у 20 матчах ва ўсіх турнірах і выбіў 3+5. Матчаў магло быць на два болей, калі б не канфлікт з Кірылам Альшэўскім пасля нічыёй з «Тарпеда-БелАЗ» (1:1). Тады галоўны трэнер у раздзявальні зладзіў камандзе разнос з прэтэнзіямі да некаторых футбалістаў. Падстрэлаў даволі груба на гэта адказаў, за што быў адпраўлены трэнавацца ў дубль, што і прывяло да пропуску двух тураў.
Гуляючы ў «Каспіі», хаўбек таксама выказваў сваю незадаволенасць галоўнаму трэнеру Ігору Ангелоўскі перад адным з матчаў, калі зразумеў, што не трапляе ў стартавы склад. Пра той міні-канфлікце пісалі казахстанскія медыі, а той матч стаў адзіным, які Падстрэлаў прапусціў за першы круг КПЛ.
У адрозненне ад Ніфікарэнкі, Падстрэлаў бʼе па варотах не толькі працоўнай нагой. У «Шахцёры» хаўбека выпускалі злева, і пасля перамяшчэння ў цэнтр ён мог паказаць у дзеянні правую нагу.
Галоўная моцная якасць Падстрэлава ў атацы – прастрэлы і навесы ў штрафную, дзякуючы чаму ён і набірае ільвіную долю пунктаў па «гол+пас». Футбаліст дэманструе эфектыўнасць і ў пазіцыйных атаках, і ў хуткіх. Пры любых варыянтах ён гатовы як завяршаць сам, так і асіставаць.
Лепш за ўсё Падстрэлаву даюцца хуткія атакі, у якіх ён можа праяўляць хуткасць і карыстацца вольнай прасторай. За БАТЭ ў гэтым стылі быў забіты мяч у вароты «Партызані», калі паўабаронца ў контратацы прабег паўполя і аддаў дакладна на Аляксандра Шасцюка (адзнака 3:13).
Падобнай перадачай, але толькі з іншага боку поля, вінгер дапамагаў забіваць партнёрам у «Шахцёры».
Падстрэлаў здольны і сам забіваць пасля прастрэлаў і навесаў. Упершыню ў Казахстане ён вызначыўся, якраз скарыстаўшыся пасам на далёкую штангу ў матчы з «Аксу» (адзнака 1:17) – той удар стаў пераможным.
Здольнасць і біць, і аддаваць робіць Падстрэлава непрадказальным у завяршальнай стадыі нападу.
Футбаліст можа спатрэбіцца «Дынама» і ў пазіцыйнай гульні. Падстрэлаў можа забіць сам з абедзвюх ног...
...а можа і аддаць галявую партнёру дакладна на лінію брамавай.
Калі глядзець на футбалістаў, якія сёння на кантракце ў «Дынама», то на правым флангу ў Падстрэлава пакуль адзін-адзіны канкурэнт за месца ў старце – Андрэй Рылач. Калі ж Скрыпчанка вырашыць адправіць навічка на фланг па вядучай левай назе, то там давядзецца змагацца з Глебам Жэрдзевым.
