Журналіст «НН» Панкавец»: «Спадзяюся, на прыкладзе Леўчанкі многія спартсмены ўбачаць, што такое падтрымка дзяржавы спорту»

«Спадзяюся, на прыкладзе Леўчанкі многія спартсмены ўбачаць, што такое падтрымка дзяржавы спорту, чаго вартыя віншаванні сатрапа: «Ваша Пабеда прымер для нас, вы гордасць страны». Баскетбалістку на Акрэсціна, толькі таму, што пасмела сказаць: сатрапу пара сысці. І раптоўна гонар краіны пераўтвараецца ў ганьбу краіны, якой кіруюць чэшскія куклаводы. А Леўчанка з фенаменальнага пакалення нашых баскетбалістак, якія ўзялі бронзу на Еўра, рубіліся за медалі на Алімпіядах і чэмпіянатах свету.

Такой моцнай каманды ў гульнявых відах спорту ў нас не было за апошнія дваццаць гадоў. Ні хакеісты, ні гандбалісты, ні тым больш, прасці госпадзі, футбалісты. Я па-ранейшаму не магу навучыцца заўзець супраць нашых зборных у розных відах спорту, але адначасова апладзірую футбалісту Іллю Шкурыну, які ў першыя ж дні гвалту напісаў ліст на беларускай мове ў АБФФ, дзе сказаў, што больш не будзе гуляць за зборную, пакуль дыктатар пры ўладзе. Гэта сапраўды ўчынак», – напісаў Панкавец у Facebook.