Калісьці жонка Міхалка заўзела за суперніка Ціхана і Дзевятоўскага на АГ – японец узяў золата і нават хацеў парадніцца з «Ляпісам»
Але застаўся толькі фанатам.
Сяргей Міхалок застаецца ў топе самых папулярных музыкаў з Беларусі. Калісьці яго ведалі як «таўстуна з гармонікам» – але ў 2000-х ён перажыў эвалюцыю вобраза і стаў сапраўдным качком.
Ужо ў добрай спартыўнай форме Міхалок уступіў у стасункі са сваёй трэцяй жонкай, актрысай Святланай Зелянкоўскай. У выніку ў іх дзецях спляліся гены артыста і паспяховага весляра – пра гэта мы ўжо расказвалі.
А другой жонкай Міхалка была яго аднагодка, спявачка Алеся Берулава. Яна нарадзілася ў сямʼі вайскоўца і ў дзяцінстве шмат пераязджала, школу скончыла ў Нямеччыне, а за «вышкай» прыехала ў Беларусь, да якой да таго дачынення не мела. У мінскім інстытуце культуры дзяўчына пазнаёмілася і пасябравала з Міхалком, а пасля атрымання дыплома вярнулася ў Германію, дзе запісала першыя песні. Але ў 1998-м ізноў прыехала ў Беларусь – тут пачала сустракацца з Міхалком, у якога «сышло каханне» з першай жонкай, і заснавала гурт «Мантана» разам са сваёй малодшай сястрой Марынай.
«Прывыкла да нататак у газетах кшталту «Дзяўчына «Ляпіса» таксама заспявала». Хоць я спяваю ўжо гадоў дзесяць, а дзяўчынай «Ляпіса» лічуся крыху больш за тры гады. Калі мы з Сяргеем Уладзіміравічам [Міхалком] раптам злучыліся, мае песні ўжо круціліся па радыё», – казала Алеся Берулава ў 2001-м.
Зрэшты, у музыцы «Ляпіса Трубяцкога» ў свайго хлопца Берулава таксама паўдзельнічала – здымалася ў кліпах на трэкі «Дружбан», «Юнацтва» і «Паштальёны». А пры запісе альбома «Залатыя яйкі» сёстры Берулавы выступалі бэк-вакалісткамі. Міхалок жа напісаў музыку для трэка «Мантаны» «Ніхто не ўбачыць».
У 2003-м Міхалок і Берулава ўзялі шлюб – ніякіх урачыстасцяў не было, як казаў музыка, «проста паставілі штамп у пашпарце, каб не задавалі лішніх пытанняў на гастролях у гасцініцах». А адразу пасля гэтага сёстры Берулавы зʼехалі ў Японію – там ім прапанавалі кантракт на пастаянныя выступленні з песнямі і танцамі ў адным з мясцовых клубаў.
Аднойчы на выступленне артыстак зазірнуў зорка японскага спорту, кідальнік молата Кодзі Мурафусі – сын японца і румынкі (таксама лёгкаатлетаў). Спартсмен да таго часу ўжо ўзяў два медалі ЧС і рыхтаваўся да АГ-2004. Па адной версіі, Мурафусі патрапіў у клуб з Берулавамі выпадкова, па іншай – яму хтосьці параіў музыку «Мантаны», і лёгкаатлет захацеў паслухаць жывы выступ.
У любым выпадку, Мурафусі ўсё спадабалася – ён нават заспяваў разам з дзяўчынамі. А потым працягнуў падтрымліваць з імі адносіны. У некаторых крыніцах нават пішуць, што дэма-альбом новага праекту сясцёр Merry Poppins у Японіі быў запісаны дзякуючы сувязям Мурафусі ў шоў-бізнэсе, а лёгкаатлет быццам хацеў зняцца ў якім-небудзь кліпе, але не склалася.
Мурафусі ў 2004-м
Пазней Алеся Берулава расказвала, што малатабоец стаў фанатам і «Мантаны», і «Ляпіса Трубяцкога» – спявачка падарыла новаму знаёмаму і альбом гурта мужа. А на АГ-2004 сёстры заўзелі за японца – хаця ў ліку яго галоўных праціўнікаў у сектары былі беларускія спартсмены Іван Ціхан і Вадзім Дзевятоўскі.
«[Мурафусі] так прыгожа кідаў! У яго быў другі вынік. Але потым ён патэлефанаваў у Мінск і сказаў: «Думаеце, у мяне срэбны медаль? Не, залаты!». Мы былі так радыя, што нават зладзілі вечарынку ў гонар перамогі нашага японскага сябра! – казала жонка Міхалка ў кастрычніку 2004-га.
Сітуацыя тлумачылася проста. На АГ далей за Мурафусі молат паслаў толькі венгр Адрыян Ануш, але праз пару дзён яго вынік анулявалі – высветлілася, што адна з яго свежых допінг-пробаў належыць іншаму чалавеку, і калі на дадатковы тэст спартсмен не зʼявіўся, яго дыскваліфікавалі за спробу падробкі. Так золата перайшло японцу, а срэбра – Ціхану, які прайграў Мурафусі больш за тры метры. Але ў 2012-м МАК абвясціў, што пераправерка афінскага аналізу цяперашняга рэжымніка выявіла анабалічны стэроід метандыянон – і медаль таксама адабралі. У выніку Дзевятоўскі падняўся ў пратаколе на трэцяе месца – але бронзу яму ў міжнародным камітэце вырашылі не выдаваць.
У той час Берулавы ўжо развівалі гурт Merry Poppins – прыцягнулі туды і самую малодшую сястру Людмілу. Праект набраў некаторую папулярнасць і ў Расіі, і ва Украіне – там дзве старэйшыя сёстры ў 2006-м нават зняліся топлес для мясцовай версіі Playboy (здымкі 18 + без цэнзуры па спасылцы).
Мурафусі працягваў падтрымліваць сувязь са спявачкамі. І ў 2006-м у Беларусі пісалі, што малатабоец прапанаваў стаць яго жонкай Марыне Берулаве, аднак тая была замужам за музыкам Дзянісам Варанцовым і сыходзіць да японца адмовілася. Зрэшты, у 2007-м Берулава развялася і зʼявіліся чуткі, што ўсё-такі праз японца. Тады дзяўчына на пытанне аб наяўнасці рамантычных стасункаў з лёгкаатлетам адказала адмоўна – але з намёкам на тое, што такія меліся.
«Гэта было даўно, і сёння нас [з Мурафусі] нічога падобнага не звязвае. У нас сяброўскія адносіны – мы стэлефаноўваемся раз на тры месяцы, міла гутарым. Развод? Проста ў жыцці так бывае, што людзі жывуць разам, а потым расстаюцца», – сказала Марына Берулава.
А на пачатку 2008-га стала вядома, што развялася і Алеся Берулава. Міхалок тады казаў, што «з Алесяй зрабілі памылку», а ў яго «больш не будзе афіцыйнага шлюбу» (але, як мы ведаем, пазней музыка ўсё ж такі ажаніўся зноў).
«Шлюб – гэта праверка для кожнага мужчыны. Якімі мы бываем рыцарамі без страху і папроку ў перыяд заляцанняў. Якімі рамантыкамі! І – гэта мой досвед, нікому не навязваю – у якіх псіхапатаў потым ператвараемся, сутыкаючыся з простымі жыццёвымі праблемамі, нейкімі хворымі неўрастэнікамі. Нашыя з Алесяй стасункі перажылі некалькі катарсісаў. Цяпер у нас платанічнае любоў. Замест жонкі ў мяне зʼявілася сястра», – дзяліўся спявак адразу пасля распаду пары.
51-гадовая Берулава цяпер жыве ў Маскве, выхоўвае дачку-школьніцу (з Міхалком у іх дзяцей не было), спявае ў адроджанай групе «Мантана» і называе сябе гештальт-тэрапеўткай. Яна звязвала расстанне з Міхалком са сваім жа ўздзеяннем на яго дзеля таго, каб музыка кінуў шкодныя звычкі – гэта атрымалася, але з пабочнымі эфектамі.
«Сярога казаў не раз: «Алеська, калі б ты займалася псіхалогіяй, ужо б мільянершай была». Ён мой першы пацыент. Я была вельмі настойлівая ў тым, каб ён кінуў піць, тады яшчэ не ведала, што блізкіх людзей нельга браць у тэрапію. І так учапілася ў яго, што ў мяне падчас лячэнні пачуцці да яго згаслі. Я жартую, што Сяргей мяне кінуў, як бухаць», – успамінала спявачка ў 2021-м, дадаўшы, што зносіны з былым мужам ужо канчаткова страчаныя.
Берулава ў 2023-м
Мурафусі стаў чэмпіёнам свету-2011 і ўзяў бронзу АГ-2012, а ў 2016-м завяршыў карʼеру. Паралельна са спортам ён сурʼёзна вучыўся – яшчэ ў 2007-м атрымаў ступень доктара біямеханікі, затым стаў прафесарам ва ўніверсітэце. У 2015-м паведамлялася, што Мурафусі ажаніўся з супрацоўніцай вытворцы спартыўных тавараў, але сёння ў яго сацсетках няма ніякіх слядоў прыватнага жыцця. Затое шмат працоўных здымкаў – экс-лёгкаатлет, акрамя выкладання, узначальвае Японскае спартыўнае агенцтва, спецыялізаванае падраздзяленне міністэрства адукацыі, культуры, спорту, навукі і тэхналогій краіны.
