Расійскія трэнеры паскардзіліся міністру спорту на ўдзел беларусаў у юніёрскім першынстве Расіі: «Абуральнае парушэнне»

Чатыры расійскія біятлонныя трэнеры, уключаючы былога галоўнага трэнера зборнай Расіі Аляксандра Каспяровіча, напісалі адкрыты ліст міністру спорту Расіі Алегу Матыцыну, дзе паскардзiлiся на тое, што прадстаўнiкi Беларусi прынялi ўдзел у вялікім мас-старце на юнiёрскiм першынстве Расіі.

«Група трэнераў лічыць неабходным звярнуць увагу на абуральнае парушэнне.

23 студзеня ў праграме спаборніцтваў значыўся вялікі мас-старт, у якім можа ўдзельнічаць 60 спартсменаў. Да гэтага старту рыхтаваліся прадстаўнікі дзясяткаў рэгіёнаў, многім з якіх давялося пераадолець няпросты адбор (удзельнічалі 92 юніёры і 65 юніёрак).

Акрамя расійскіх юніёраў, у спаборніцтвах у Рыбінску прымалі ўдзел і некаторыя юніёры з Беларусі, якія стартавалі па-за конкурсам у дысцыплінах «спрынт» і «супер-спрынт». Там іх удзел не ствараў ніякіх праблем расійскім спартсменам і нават, наадварот, дадаваў у барацьбе вастрыні.

Аднак у старт-лісце вялікага мас-старту, дзе колькасць удзельнікаў абмежаваная, усе беларускія спартсмены таксама прысутнічалі, пазбаўляючы частку расійскіх біятланістаў удзелу ў старце, які ўплывае як на іх асабістыя рэйтынгі, так і на рэйтынг рэгіёнаў, якія яны прадстаўляюць.

У адказ на наш пытанне, чаму такое дапускаецца, тэхнічны дэлегат Вадзім Меліхаў спаслаўся на вуснае распараджэнне прэзідэнта Саюзу біятланістаў Расіі Віктара Майгурава.

Звяртаем Вашу ўвагу, што, прымаючы і выконваючы такое рашэнне, кіраўнікі СБР груба парушаюць палажэнне аб спаборніцтвах, не кажучы ўжо пра тое, што першынство Расіі праводзіцца на бюджэтныя сродкі РФ. Рыхтуючы спартсменаў і камандзіруючы іх для ўдзелу ў першынстве краіны, рэгіёны марнуюць свае сродкі, якія ў сучасных умовах вельмі абмежаваныя.

Нам бы хацелася, каб галоўныя спаборніцтвы краіны праводзіліся ў справядлівай і сумленнай барацьбе, а кіраўнікі Саюзу біятланістаў Расіі выконвалі б законы і дзейнічалі ў інтарэсах развіцця віду спорту ў Расійскай Федэрацыі», – гаворыцца ў звароце да Матыцына.