На рэжымным ТБ паказалі, як ідзе рэканструкцыя бядовага стадыёна «Нафтана». Што ўжо паспелі зрабіць?
Не тое каб звярталі ўвагу на футбол.
11 ліпеня на рэжымным тэлеканале «Звязда. Наваполацк» выйшаў сюжэт пра рэканструкцыю мясцовага стадыёна «Атлант», якому ў белфутболе не раз даставалася за трухлявы стан
Па словах начальніка аддзела спорту і турызму Наваполацкага рэжымнага гарвыканкаму Пятра Ражкова, у бягучым годзе на арэне планавалася правесці мадэрнізацыю бегавых дарожак і сектараў. На дадзены момант «амаль на 100%» скончаны бетонныя працы, і ў хуткім часе пачнуць слаць новае «сучаснае» пакрыццё.
Таксама плануецца знізіць плот перад трыбунамі на тры пралёты, што, па словах Ражкова, паспрыяе большай асалодзе гледачоў ад футбольных і лёгкаатлетычных спаборніцтваў «не праз клетачку» (іранічныя словы ў цяперашняй Беларусі).
Яшчэ на «Атланце» запланавалі замену старога табло на новае, якое таксама «будзе адпавядаць сучасным стандартам». Нагадаем, вось што атрымаў Наваполацк у апошні раз, калі мянялі табло – падрабязнасці функцыянавання паказваў YouTube-канал «ЧестнОК»:
Таксама, як сцвярджае Ражкоў, на «Атланце» выправілі недахопы – зрабілі два сектары для скачкоў у даўжыню (раней быў адзін), аддалілі бетон ад футбольнага поля.
Скончыць працы на стадыёне плануецца да верасня. У тым жа месяцы хочуць правесці «маштабнае адкрыццё» адноўленага «Атланта» – падчас матчу ЧБ з удзелам «Нафтана» і падчас правядзення лёгкаатлетычнага турніру «на ўзроўні не меней за абласны».
У канцы сюжэту Ражкоў адзначыў, што правядзенне мадэрнізацыі ажыццяўляецца за кошт сродкаў падаткаплацельшчыкаў (чыноўнік назваў гэта «сродкамі бюджэту») і на дадзены момант асвоілі 30% бюджэту.
Пакуль жа «Нафтан» прымае хатнія матчы вышэйшай лігі ў абласным цэнтры на ЦСК «Віцебскі». У сярэднім не гульні «нафтавікоў» прыходзіць па 462 гледачы. Менш у чэмпіянаце мае толькі «Энергетык-БДУ» (395).
