Экс-суддзя ЧБ Аніхімоўскі пра ўплыў прапаганды: «Кучэра» мне скардзіўся, што жыццё ў Беларусі пагоршылася, што ў судзействе і футболе ўсё дрэнна, але ў астатнім свеце ж яшчэ горш»
Экс-суддзя чэмпіянату Беларусі Віталь Аніхімоўскі ў інтэрв'ю з Telegram-каналам «О, спорт! Ты – мир!» падзяліўся меркаваннем аб прапагандзе.
– Чаму людзі вераць прапагандзе?
– Таму што ў іх проста няма магчымасці выехаць і паглядзець на іншае жыццё на свае вочы.
У мяне неяк была не вельмі прыемная размова з адным з беларускіх арбітраў. Я – не Дудзь, а ён – не Кучэра, але ў нас быў падобны дыялог :). Распавядаў яму пра тое, што ўбачыў, праз што прайшоў, пакуль жыў у Варшаве. У адказ на гэта суразмоўца заяўляе: «Не веру, бо ў мяне знаёмы жыве ў Еўропе, там галеча, працы няма, легалізавацца немагчыма». Кажу яму: «Так, свае цяжкасці ёсць, але калі ты падвучыш мову, калі пазнаёмішся з людзьмі, ды калі сам захочаш палепшыць сваё жыццё, то будзе нашмат прасцей». Але адчуваў, што кажу ў нейкую сцяну, суразмоўца не хацеў слухаць, а сыпаў заезджанымі фразамі, якімі гаворыць прапаганда. Плюс стаў заўважаць, што на беларусаў вельмі моцна пачала ўплываць расійская прапаганда - гэта страшная штука. І ёй вераць нават маладыя людзі. Параіў бы такім зрабіць візу і на свае вочы паглядзець іншы ўзровень жыцця – убачыць Еўропу.
Самае пацешнае, што гэты «Кучэра» мне скардзіўся на тое, што жыццё ў Беларусі пагоршылася, ён гэта прызнае, што ў судзействе і беларускім футболе ўсё дрэнна, але ў астатнім свеце ж яшчэ горш. Мне здавалася, што я слухаў Салаўёва :). Людзі, хаця б на нейкі час пакіньце Беларусь і паглядзіце, як жыве іншы свет, а не слухайце прапаганду, – сказаў Аніхімоўскі.