Мікалай Хадасевіч: «У гульцоў з Беларусі два варыянты: скончыць кар'еру альбо выконваць умовы, прыдуманыя «Мінспорту»
Беларускі журналіст Мікалай Хадасевіч падзяліўся меркаваннем аб пакаянных прэс-канферэнцыях футбалістаў Станіслава Драгуна і Аляксандра Гутара.
– Як ставіцеся да пакаянных прэс-канферэнцый Станіслава Драгуна і Аляксандра Гутара?
– Калі бачу такія рэчы, то думаю, што ў гульцоў з Беларусі сёння два варыянты: скончыць кар'еру і займацца сваімі справамі альбо выконваць умовы, прыдуманыя «Мінспорту», камісіямі ці яшчэ кімсьці, калі хочаш застацца ў футболе. Драгун і Гутар зрабілі выбар на карысць футбола. Ім за гэта і несці адказнасць. Я не бог, каб судзіць.
– Ці здзівіла адсутнасць салідарнасці сярод гульцоў з тымі, хто апынуўся ў чорным спісе і не мог выходзіць на поле?
– А калі яна была? Усё клішэ, што спартоўцы, футбалісты ядуць адзін хлеб, – толькі гучныя словы. Мы бачым, што ў Беларусі хлеб розны, і ніхто не будзе аб'ядноўвацца і абараняць калег. І падобных прыкладаў хапае. Трэнеры вышэйшай лігі не адстойвалі калектыўна пазіцыю наконт штучнага ўвядзення ў склад маладых гульцоў, хоць нібыта пагалоўна былі супраць.
Спускаецца ўстаноўка федэрацыі – і кропка. Так і ў дадзенай сітуацыі. Складана ўявіць калектыўную забастоўку ці акцыі салідарнасці перад матчамі, – сказаў Хадасевіч.