Абаронца мінскага «Дынама» Гаўрыловіч: «Калі Сядзько б'е па варотах, заўсёды ёсць пачуццё, што можа заляцець»
Абаронца мінскага «Дынама» Аляксей Гаўрыловіч пасля перамогі над «Нёманам» (1:0) у першым матчы 1/2 фіналу Кубка Беларусі.
– «Дынама» страціла яшчэ аднаго цэнтральнага абаронцы, гэтым разам праз чырвоную картку. Як выдаленне Бегунова паўплывала на гульню?
– Зразумела, што ў меншасці гуляць складана – прыйшлося сур'ёзна перабудоўвацца і шмат абараняцца. Але, у прынцыпе, усе справіліся, паспявалі зачыняць свае зоны. Зразумела, што асабліва цяжка было ў канцоўцы, калі супернік выпусціў высакарослых гульцоў і зладзіў навал. Аднак мы і тады справіліся.
– Калі 75 хвілін даводзіцца гуляць у меншасці, ведаючы, што будзе яшчэ гульня ў адказ, напэўна, складана не думаць пра нічыю, як пра добры варыянт?
– Вядома, пры падрыхтоўцы да матчу ты не рыхтуешся да таго, што можа быць выдаленне. Гэтую сітуацыю проста даводзіцца прыняць і дзейнічаць ужо пры новых абставінах. Прычым з «Нёманам» цяжка гуляць нават у поўным складзе. У гэтай сітуацыі трэба проста трываць і чакаць свайго шанцу, што мы і рабілі.
– «Дынама» забіла «Нёманам», можна сказаць, з распранальні. Якой наогул была ўстаноўка Вадзіма Скрыпчанка на другі тайм?
– У прынцыпе, прасіў працягваць дзейнічаць гэтак жа, як і да перапынку – строга ў абароне і чакаць шанцу ў контратацы. А калі Паша Сядзько б'е па браме, заўсёды ёсць пачуццё, што можа заляцець, – сказаў Гаўрыловіч.
