Гулец «Нафтана» Калядка: «На матч з «Тарпеда-БелАЗ» ехалі гуляць на перамогу»
Гулец «Нафтана» Міхаіл Калядка падзяліўся меркаваннем пра матч з «Тарпеда-БелАЗ» (1:2).
– Ехалі гуляць на перамогу. Забілі хуткі гол, пасля чаго аддалі ініцыятыву суперніку. «Тарпеда» больш валодала мячом, мы ж гулялі другім нумарам на контратаках. Так атрымалася, што прапусцілі мяч у распранальню. І ў канцоўцы гульні яшчэ адзін... У выніку прайгралі. Што тут яшчэ сказаць...
– Не ўдаецца пакуль перамагчы-5 нічыіх, 3 паразы. Як будзеце пераломваць гэтую сітуацыю?
– Мы на кожную сустрэчу выходзім з мэтай перамагчы. Пры добрай гульні з двума «Дынама» і БАТЭ дзесьці не пашанцавала, згулялі ў нічыю. І сёння забей з трох момантаў адзін ці два галы, былі б усе шанцы, каб павезці тры ачкі. Нашы перамогі яшчэ наперадзе. Галы ёсць, засталося рэалізоўваць моманты, якія мы ствараем.
– Пасля другога прапушчанага мяча паміж Харытонавічам і Мідо ўзнікла слоўная сварка. На правах капітана, як ацэніце дадзены эпізод?
– Працоўны момант, эмоцыі. Ніхто не хоча прайграваць, за кошт гэтага трохі завяліся. Усё нармальна, ніякіх праблем няма.
– Вы штатны выканаўца стандартаў. Што, пакуль не атрымліваецца, каб рэгулярна з вашых падач забіваліся галы?
– Пакуль не ідзе. Не можам забіць. На трэніроўках шмат часу ўдзяляем стандартным палажэнням. Гэта тое, над чым нам трэба яшчэ працаваць.
– Першы матч у складзе вашага клуба правёў пачатковец Дамінік Дзінга. Як яго прынялі ў калектыве?
– Праблем з тым, каб уліцца ў калектыў, калі ты добры хлопец і кваліфікаваны футбаліст, у нас няма. Думаю, яму прыемна знаходзіцца і гуляць за нас, – сказаў Калядка.