Дысцыплiна – праблема для ўсiх Лісаковічаў, але вось самы незалётны: дапамог поспехам Жодзiна, танчыў з партнёрам, пужаў непрытомнасцю
Для Крывушэнкi «расточку не хапае».
У белфутболе ёсць тры браты Лiсаковiчы. Старэйшы Віталь, якому хутка 26, усю кар'еру выклiкае пытанне сваiмi паводзiнамi – у чарговы раз гулец не стаў выконваць патрабаваннi ў «Рубіне», з-за чаго некалькi месяцаў там не гуляў ды нядаўна пайшоў у арэнду ў «Балтыку».
Малодшы брат, 21-гадовы Руслан, пасля паспяховага сезона ў ЧБ-2022 за «Іслач» (4 гола ды 5 асiстаў у 23 матчах вышэйшай лігі), адправіўся ў махачкалінскае «Дынама» з расійскага Д2, дзе спачатку не быў гульцом асновы, потым, здавалася, стаў такiм, але ж усё перакрэслiў п'яны выхад у партугальскi горад пасля матча моладзевай зборнай. Руслан выклiкаў сутычку, упаў i ударыўся галавою, што магло скончыцца вельмi дрэнна для здароўя. Абышлося – але ж з таго часу не гуляў, а замест мiжсезонкi, да якой павiнен быў аднавiцца ў Махачкале, скасаваў кантракт з клубам 20 студзеня.
Пры гэтым калi малодшаму брату было 18, старэйшы распавядаў, што «ў плане футбольных якасцяў гэта проста звер, топ-футбаліст, калі яму дапамогуць і накіруюць у патрэбнае рэчышча, ён зможа гуляць і ў Англіі, і ў Іспаніі, і ў Германіі». Але пакуль Руслан далёкi ад прагнозаў Віталя.
А вось яшчэ адзiн Лicаковiч такiх пахвал ад Віталя не атрымлiваў, хаця сам расказваў, што хоча пайсці па шляху старэйшага брата і лічыў таго самым перспектыўным футбалістам Беларусі. Гаворка пра сярэдняга з братоў, 24-гадовага Дзмiтрыя.
Гэты футбалiст пакуль выступаў толькі ў беларускіх клубах. У 15 гадоў ён дэбютаваў ва «Уздзе», потым гуляў у дублi «Шахцёра», у 2017-м атрымаў першы досвед у Д1 у «Крумкачах». У пачатку 2018-га Лicаковiч-сярэднi не прайшоў прагляд у «Тарпеда-БелАЗ». Далей было вяртанне ва «Узду», потым – «Тарпеда» Мінск, за якое ў «вышцы» згуляў зусiм мала. А затым увогуле сыход з футбола – Лiсаковiч сказаў, што ў яго там не атрымлiваецца, i падпiсаў кантракт з футзальнай «Сталіцай». Але i ў гэтай камандзе за паўтара года гулец правёў толькi дзевяць матчаў.
У 21 год Лicаковiч змог перазагрузiцца – у пачатку 2021-га вярнуўся ў вялiкi футбол, прыглянуўшыся на трэнiроўках «Іслачы», першы сезон правёў у абойме, выходзячы больш на замену. А вось у 2022-м стаў адным з лiдараў – адыграў амаль усе матчы цалкам, аформіў два галы i чатыры асiсты у ЧБ, нават атрымаў капітанскую павязку.
У пачатку 2023-га Лісаковіч перайшоў у «Тарпеда-БелАЗ», якому калiсьцi не спатрэбiўся. У Жодзiна футбалiст здолеў адзначыцца вынiковым дзеяннем ужо ў дэбютным афiцыйным матчы – у чвэрцьфінале Кубка з «Шахцёрам» выканаў дакладную падачу з кута поля на галаву Аляксандра Чыжа (адзнака 1:07).
У першым туры ЧБ-2023 Лicаковiч зарабіў на сабе выдаленне капітана брэсцкага «Дынама» Эдгара Аляхновіча. Гулец Жодзiна адштурхнуў Аляхновiча ад свайго таварыша па «Тарпеда-БелАЗ» (за што атрымаў жоўтую), а ў адказ атрымаў удар у галаву (адзнака 2:25).
Пасля матча галоўны трэнер таго «Дынама» Iгар Крывушэнка крытычна выказаўся пра 167-сантыметровага гульца: «Гэты хлопчык справакаваў, ды расточку яму не хапае – вось Аляхновiч i патрапiў [па галаве], хаця не бiў».
У 2023-м Лісаковіч гуляў рэгулярна. Сумарна правёў 31 матч ва ўсіх турнірах, вызначыўся адным забітым мячом (прынёс перамогу з пенальцi ў матчы 8-га тура супраць БАТЭ, ВIДЭА) і пяццю галявымі перадачамі. Адна з iх дапамагла здабыць нiчыю ў матчы ў адказ з кiпрскiм АЕК (1:1 пасля 2:3 у першым) у Лiзе канферэнцый (адзнака 3:33).
У самай канцоўцы выязнога матча з «Гомелем» у 12-м туры ЧБ-2023 паўабаронца без бачнай прычыны паваліўся на газон, чым усiх спалохаў. Але футбалiста хутка прывялi ў прытомнасць, а потым ён сказаў: «Проста адчуў недамаганне. Усё нармальна. А што павiнна быць не так?».
Лісаковіч таксама адзначыўся святкаваннямі забітых мячоў разам з габонскім форвардам Эманюэлем Авано. Гульцы зладзілі танцы пасля галоў легіянера ў вароты «Нафтана» (дарэчы, з перадачы Лісаковіча, ВIДЭА) i «Мінска».
«Ён добра адчувае рытм, у яго атрымліваецца падхапляць мой танец. Бывае, што мы танчым і на трэніроўках. Проста кайфуем так», – гаварыў Авано пра аднаклубнiка.
У 2023-м Лicаковiч узяў з «Тарпеда-БелАЗ» Кубак Беларусі i бронзавыя медалі ЧБ. А 8 верасня ў гульца нарадзілася дачка. З гэтай нагоды ён зрабiў прысвячэнне сваёй жонцы Аліне.
З гэтага аповеду можна зрабiць выснову, што Дзмiтрый – самы спакойны з братоў Лiсаковiчаў. Але ж i ў яго ў мiнулым годзе выявiлiся праблемы з дысцыплiнай. Як стала вядома «Трыбуне», падчас трэніровак у «Тарпеда-БелАЗ» ён мог не выконваць устаноўкі Дзмітрыя Молаша, ішоў на імправізацыю, а яшчэ канфліктаваў з аднаклубнікамі. Таму ў канцы лета трэнер, нягледзячы на важнасць гульца, перавёў таго ў дубль. Але ж праз два тыднi Лiсаковiча вярнулi, а той усё зразумеў i больш парушэнняў дысцыплiны не дапушчаў. I будзе дапамагаць камандзе Молаша змагацца за чэмпiёнства ў 2024-м – 14 студзеня гулец падоўжыў кантракт з клубам.
