Лісаковіч пасля п'янай траўмы галавы гатовы вярнуцца ў гульню – для гэтага застаўся без адпачынку ў расійскім клубе
Там яго не каралі.
13 кастрычніка ў маладзёжнай зборнай Беларусі пасля чарговага болю паражэння (1:6 ад Партугаліі) дадаўся яшчэ адзiн – паўабаронца каманды Руслан Лісаковіч трапіў у бальніцу. Як пазней даведалася «Трыбуна», у «маладзёжцы» і да таго былі сустрэчы з алкаголем, а пасля разгрому ў Партугаліі гульцы, выпіўшы, пайшлі гуляць – а 21-гадовы апорнік пачаў «дакопвацца» да мінакоў. Вынікам стала сутычка, у якой Руслан упаў на асфальт і моцна стукнуўся галавой. У такіх гісторый бывае і смяротны зыход, але Лісаковіча пранесла – у шпіталі, куды яго адвезлі на хуткай, вырашылі, што абыдзецца нават без аперацыі.
З таго часу Руслан не ўдзельнічаў у афіцыйных матчах за свой клуб расійскага Д2 «Дынама» з Махачкалы, а навін пра ягоны стан не паступала. «Трыбуна» даведалася, як зараз пачуваецца Лісаковіч і ці паўплывала сітуацыя на яго становішча ў Дагестане.
У АБФФ пацвердзілі траўму Лісаковіча толькі 19 кастрычніка – апублікавалі каментарый тады яшчэ галоўнага трэнера «маладзёжкі» Сяргея Ясінскага. Той сказаў, што Руслан сапраўды пасля матча выйшаў у горад, дзе быў збіты з ног і страціў прытомнасць ад удару галавой аб маставую. Аднак коўч настойваў на тым, што медыкі не зафіксавалі ў гульца ап“янення. Ды і ўвогуле ў версіі Ясінскага гэта невядомыя прысталі да Лісаковіча, а не наадварот, а з боку футбаліста не было ніякіх «агрэсіўных дзеянняў». Зрэшты, нават такі выклад дасць фору паведамленню ад жонкі Руслана Ксеніі, якая да таго паспела заявіць, што з мужам нібыта «ўсё добра», а ўсё напісанае пра яго нібыта выдумалі.
Пракаментаваў сітуацыю 19 кастрычніка і прэзідэнт махачкалінскага «Дынама» Гаджы Гаджыеў, які заявіў, што спачатку правядзе з гульцом «сур“ёзную размову», а ўжо потым будзе вызначаць, ці трэба прымяняць санкцыі. На пытанне наконт скасавання кантракта Гаджыеў адказаў, што «такі варыянт магчымы толькі ў крайнім выпадку».
У лістападзе «Трыбуне» стала вядома, што ў канцы кастрычніка Лісаковіча выпісалі з партугальскай лякарні. Як удалося даведацца, пасля гэтага Руслан адразу адправіўся ў размяшчэнне «Дынама» ў Махачкалу. Там з ім сапраўды правялі размову пры ўдзеле кіраўнікоў і трэнераў клуба, якія хацелі высветліць усе абставіны інцыдэнту. Але пра датэрміновае скасаванне кантракту, які дзейнічае да 30 чэрвеня 2024 года, гаворкі не ішло нават ва ўмоўным ладзе. Ды і пра тое, каб на Лісаковіча наклалі штраф, нашыя крыніцы нічога не чулі.
Паводле інфармацыі «Трыбуны», Лісаковіч у «Дынама» не адразу вярнуўся да трэніровак, а яшчэ некалькі тыдняў працягваў рэабілітацыю пад назіраннем клубных лекараў. Да заняткаў футбаліст пачаў у другой палове лістапада, і тое медыкі дазволілі толькі індывідуальныя трэніроўкі.
Тым часам «Дынама» праводзіла свае матчы – апошні ў 2023-м адбыўся 27 лістапада, пасля чаго ў расійскім Д2 наступіў перапынак, і футбалісты каманды сышлі ў адпачынак у рангу лідараў турнірнай табліцы. Аднак, як мы даведаліся, беларускі паўабаронца замест гэтага працягнуў працу.
– Лісаковіч трэніруецца па індывідуальнай праграме. Плюс дадаткова з [удзельнікам расійскага Д4] «Дынама-2», бо першая каманда ў адпачынку зараз, у адрозненне ад другой, – так адказалі ў клубнай прэс-службе на запыт «Трыбуны». Тэрміны вяртання гульца на поле ў клубе ўдакладняць не захацелі – паведамілі, што больш разгорнутага каментарыя не будзе.
Зрэшты, у «Трыбуны» атрымалася даведацца, што Руслан вернецца ў асноўную каманду ўжо 6 студзеня – у гэты дзень яна выйдзе з адпачынку і пачне першы збор у Махачкале, пасля якога правядзе яшчэ два ў турэцкай Анталлі. Па нашай інфармацыі, Лісаковіч павінен паўнавартасна ўдзельнічаць ва ўсіх этапах міжсезоннай падрыхтоўкі клуба – медыцынскія паказчыкі гэта ўжо дазваляюць.
Д2 Расіі для «Дынама» адновіцца 3 сакавіка – Лісаковіч, калі абыдзецца без новых траўм, цалкам можа вярнуцца ў аснову ўжо ў першым вясновым матчы. Супернікам махачкалінцаў у ім стане саратаўскі «Сокал», які нядаўна ўзначаліў беларускі трэнер Аляксей Бага.
Магчыма, Лісаковіч здолее дапамагчы «Дынама» ўтрымаць лідарства ў табліцы да канца сезона – наперадзе яшчэ 14 тураў, а махачкалінцаў з 37 баламі падпіраюць «Хімкі» (36 ачкоў), «Цюмень», «Акрон» і тульскі «Арсенал» (па 35). Пакуль у актыве беларускага паўабаронцы толькі адна галявая перадача ў 21 матчы за «Дынама» ва ўсіх турнірах.
Фота: dinamo-mx.ru
