Называў сябе новым Ібрам і быў у клубе АПЛ, а яго бацька здаваў матчы ў Нідэрландах. Як у Магілёў патрапіла надзея кіеўскага «Дынама»
Самы незвычайны навічок ЧБ у гэта міжсезонне.
На днях магілёўскі «Дняпро» падпісаў 24-гадовага цэнтрфорварда з Сьера-Леонэ Ібраіма Каргбо. Калісьці ён гуляў за юнацкія зборныя Бельгіі, называў сябе новым Ібрай і марыў пра АПЛ. Ігар Суркіс лічыў гэтага футбаліста з ростам 190 см істотным узмацненнем для кіеўскага «Дынама». Яго бацька вядомы тым, што здаваў матчы ў Нідэрландах.
Выглядае, што навічкі з больш насычанай біяграфіяй у чэмпіянат Беларусі ў гэтае міжсезонне ўжо не прыедуць.
Бацьку забанілі за здачу матчаў
Бацька навічка «Дняпра», якога таксама клічуць Ібраім Каргбо, быў прафесійным гульцом. Футбольную адукацыю апорнік атрымаў у акадэміі «Феенорда», а большую частку карʼеры правёў у наймацнейшых лігах Бельгіі і Нідэрландаў, дзе агулам згуляў 248 матчаў пры пяці галах. Таксама на рахунку паўабаронцы 34 сустрэчы і адзін гол за зборную Сьера-Леонэ.
Матчаў за нацыянальную каманду магло быць і болей, калі б не скандалы з дамоўнымі матчамі, у якіх неаднаразова аказваўся Каргбо-старэйшы. У ліпені 2014-га ён у статусе капітана зборнай трапіў у пералік 15 сьералеонскіх гульцоў і афіцыйных асоб, хто здаў матч адбору на Кубак афрыканскіх нацый-2008 супраць ПАР (0:0). У пачатку наступнага года абвінавачванняў у Каргбо паболела. Сцвярджалася, што, выступаючы за «Вілем II», ён быў асноўнай кантактнай асобай з ігральным сіндыкатам, якому прадалі паразы ў матчах з «Аяксам» і «Феенордам». Каргбо абвяргаў абвінавачанні – і іх у выніку знялі ў лютым 2015-га.
Але роўна праз год у Нідэрландах знайшлі доказы актыўнага ўдзелу Каргбо ў дамоўных матчах. Адзін з эпізодаў адбыўся ў сезоне-2009/10, калі «Вілем II» прайграў «Утрэхту» 0:1. Па выніку паўабаронцу забаранілі гуляць у мясцовым чэмпіянаце. Паралельна нідэрландскія футбольныя чыноўнікі накіравалі ліст у ФІФА з просьбай аб міжнароднай дыскваліфікацыі.
Каргбо адправіўся гуляць на паўпрафесійны ўзровень у глыбокі англійскі мінор, а ліст з Нідэрландаў у ФІФА разгледзелі толькі праз тры гады, у красавіку 2019-га, і такі выпісалі дыскваліфікацыю. Сёння мужчыну ўсяго 41 год, а яго сыну, навічку «Дняпра», – 24.
«У нас розныя карʼеры. Я быў вельмі няшчасны, калі даведаўся пра гэта [пажыццёвую дыскваліфікацыю]. Часам, калі я адзін у пакоі, я вельмі хвалююся. Людзі ўводзяць маё прозвішча ў Google і ў першую чаргу бачаць інфармацыю пра майго бацьку, а не пра мяне», – кажа Каргбо-малодшы.
Гуляў у футбол і яго дзядзька, цэнтральны абаронца Сідні Каргбо – правёў 26 матчаў у наймацнейшым дывізіёне Бельгіі за «Брусель» і 8 за зборную Сьера-Леонэ.
Падпісваўся клубам АПЛ
Да васьмі гадоў Каргбо-малодшы жыў у Сьера-Леонэ, а затым пераехаў да бацькі ў Бельгію, дзе трэнаваўся ў школе «Берсхота». У Вялікабрытанію нападаючы адправіўся раней за Каргбо-старэйшага. Ва ўзросце 14 і 15 гадоў станавіўся найлепшым бамбардзірам у дзіцячых камандах «Рэдынга». Улетку 2016-га 16-гадовы Ібраім Каргбо перайшоў у «Крыстал Пэласа», з якім заключыў трохгадовы кантракт.
«З Божай ласкай я пастараюся паказаць усё найлепшае, што ў мяне ёсць, каб у недалёкай будучыні згуляць за першую каманду «Пэлас», – казаў футбаліст пасля падпісання з клубам, які на той момант выступаў у Англійскай прэмʼер-лізе.
«Упэўнены, мой сын трапіць у «Пэлас», бо ён добры страйкер, здольны забіваць», – марыў Каргбо-бацька.
Аднак нічога такога не адбылося. Юнак быў вымушаны пакінуць Брытанію праз праблемы з дакументамі – яму не дазволілі заставацца ў краіне.
Гуляў за зборныя Бельгіі
Пасля паўгадавой паўзы ў студзені 2018-га Каргбо падпісаўся з «Русэларэ» з другога па сіле дывізіёна Бельгіі. У двух апошніх матчах сезона-2017/18 яго выпускалі ў канцоўках на замену – і гэта быў першы вопыт на дарослым узроўні.
Тады ж перад футбалістам узнікла дылема – ён атрымаў выклік з юніёрскай зборнай Бельгіі і нацыянальнай зборнай Сьера-Леонэ. Каргбо абраў першы варыянт праз тое, што адбылося з яго бацькам. Малады чалавек лічыў тую сітуацыю несправядлівай.
«Я сапраўды не ведаю, ці буду гуляць [за Сьера-Леонэ], таму што тое, што яны зрабілі з маім бацькам, нядобра», – казаў Каргбо.
Бацька футбаліста прыняў такую пазіцыю.
«Тое, што яны са мной зрабілі, – гэта дрэнна, але я не буду вырашаць будучыню майго сына. Ён можа сам вырашыць сваю будучыню. Я зычу яму, каб ён быў там, дзе шчаслівы. Калі гульня за Бельгію зробіць яго паспяховым футбалістам на міжнародным узроўні, то чаму б і не», – дзяліўся думкамі Каргбо-старэйшы.
Каргбо-малодшы так і не правёў ніводнага матча за Сьера-Леонэ.
Спачатку хлопца найгравалі ў зборнай Бельгіі U-18, а перад стартам адбору на ЧЕ-2019 U-19 перавялі ў каманду на год старэйшую. Ужо ў першым матчы за дзевятнаццацігодак Каргбо паразіў вароты англійскіх аднагодкаў у таварыскім матчы (1:2). У кваліфікацыі ЧЕ ён прыняў удзел у пяці гульнях з шасці. У заключнай бельгійцы ўляцелі Украіне 2:5 і страцілі пуцёўку на Еўра.
Аднойчы нападаючага выклікалі ў моладзевую зборную Бельгіі, але згуляць за яе не далі.
Суркіс быў упэўнены, што гэта ўзмацненне для «Дынама» Кіеў
На ўзроўні бельгійскага Д2 Каргбо сябе не праявіў – у «Руселарэ» то выходзіў у старце, то наогул не трапляў у заяўку. Улетку 2019-га яго аддалі ў арэнду «Льерс Кемперзонен» з Д3, аднак і там надоўга затрымацца не ўдалося. У лістападзе 2019-га Каргбо «па сямейных абставінах» расстаўся з абодвума клубамі.
Да таго моманту ён меў на руках прапанову ад кіеўскага «Дынама», якую перадаў яму агент Дзмітрый Сялюк. Кантракт быў падпісаны ў снежні 2019-га на тры гады, а «Руселарэ» нават атрымаў адступныя за маладога гульца.
«Гэта будзе нашае ўзмацненне, гарантую», – быў упэўнены тады ўласнік украінскага клуба Ігар Суркіс.
Разам з Каргбо ў Кіеў пераехала і яго дзяўчына Мелані Цімерманс – нідэрландская спявачка, танцорка і мадэль.
Мяркуючы па сацсетках Мелані і Ібраіма, яны больш не разам. Цяпер дзяўчына жыве ў ПАР.
Каргбо натхніў дынамаўскіх заўзятараў, калі аформіў дубль у першым жа матчы на турэцкім зборы.
Аднак праз некалькі дзён высветлілася, што футбаліст прапусціць вясновую частку чэмпіянату-2019/20. Пасля «Руселарэ» і «Льерс Кемперзонен» «Дынама» станавілася трэцяй камандай за сезон – і менавіта такая колькасць клубаў максімальна дапушчальная па рэгламенце ФІФА, аднак выступаць у афіцыйных матчах можна толькі за два клубы ў сезоне. У Каргбо быў пералёт, але дынамаўцы ведалі пра гэта пры падпісанні кантракту. Хлопец у той час называў сябе наступным Ібрам, абыгрываючы сугучча свайго імя з тым, як скарочана клічуць Златана Ібрагімавіча.
Форварду прыйшлося чакаць паўгода, да чэрвеня 2020-га, каб упершыню згуляць за «Дынама» ў афіцыйным матчы. Праўда, за кіяўлян Каргбо правёў усяго 80 хвілін, што набеглі за тры сустрэчы. У другой з іх нападаючы забіў ва ўласныя вароты і ў 20 гадоў і 177 дзён стаў самым маладым замежным аўтарам аўтагола ў гісторыі УПЛ (адзнака 5:23).
У ліпені 2020-га «Дынама» ўзначаліў Мірча Лучэску, і ён не бачыў легіянера ў абойме. За гульнявой практыкай Каргбо адправілі ў арэнду да «Алімпіка». За данецкі клуб у сезоне-2020/21 форвард забіў тры мячы ў 20 матчах, у сярэднім праводзячы на полі 44 хвіліны. Тады ж яго ўключылі ў пяцёрку ўзыходзячых зорак Сьера-Леонэ, якія выступаюць у Еўропе.
У канцоўцы таго сезону легіянер няўдала сутыкнуўся з брамнікам «Зары» Міколам Васілём. Апошняга, прагледзеўшы ВАР, суддзя выдаліў.
Нападніка даставілі з Чарнігава ў адну з кіеўскіх бальніц, дзе быў зафіксаваны шматасколкавы пералом вялікай галёначнай косткі. Каргбо дзве гадзіны правёў на аперацыйным стале.
Амаль 2,5 гады не мог забіць
Аднаўленне расцягнулася на сем месяцаў. Лучэску па-ранейшаму не бачыў гульца ў складзе, і ў студзені 2022-га той зʼехаў да канца сезона ў арэнду ў «Цэле» Івана Маеўскага. Са славенскім клубам Каргбо не адпрацаваў і месяца, пасля чаго адправіўся дааднаўляцца ў Антвэрпэн.
Улетку 2022-го, калі ўжо ішла вайна, форвард паехаў у чарговую арэнду – на гэты раз у кіпрскі «Доксу», які апошнія сезоны фінішаваў побач з зонай вылету. Праседзеўшы першыя пяць тураў у запасе, Каргбо дэбютаваў за каманду ў кастрычніку 2022-га – праз 17 месяцаў пасля пералому. Да зімовага перапынку ён яшчэ шэсць разоў выйшаў на поле (усяго аднойчы – у страце). Гадавую арэнду перапынілі на палове тэрміна.
У пачатку 2023-га футбаліст і кіяўляне разарвалі кантракт, які дзейнічаў яшчэ паўгода. Сялюк ізноў прапанаваў варыянт з «Цэле» – Каргбо пагадзіўся. За вясну-2023 правёў у Славеніі ўсяго сем матчаў, і на другую палову года адправіўся ў «Солін» з харвацкага Д2. Там ён здолеў забіць у чацвёртым матчы, паразіўшы вароты «Цыбаліі» (1:3). Гэты гол стаў першым у афіцыйных сустрэчах за два гады і чатыры месяцы.
Пасля Каргбо вызначыўся яшчэ раз у трох матчах, а затым атрымаў траўму і выбыў да канца года. У снежні 2023-га бакі спынілі супрацу па ўзаемнай згодзе.
Чарговая спроба стаць новым Ібрай адбудзецца ўжо ў Магілёве.