Крэйг Вудкрафт: «Дрэнна, што мінскае «Дынама» не завяршала 3 папярэднія матчы ў асноўны час, гулялі добра і мелі перавагу. Хачу, каб сёння ўсё склалася на нашу карысць»
Галоўны трэнер мінскага «Дынама» Крэйг Вудкрафт падзяліўся чаканнямі ад матчу з маскоўскімі аднаклубнікамі ў КХЛ, а таксама аб гульцах масквічоў, якія могуць патрапіць у ростер зборнай Беларусі.
– Раскатка прайшла добра. Усе сабраны і гатовы да гульні.
– Раман Гарбуноў на раскатцы ў чорнай джэрсі. Ён згуляе сёння?
– Так [ён тут].
– Ці ёсць заканамернасць, што тры апошнія матчы завяршаліся за межамі асноўнага часу?
– Дрэнна, што мы не завяршалі папярэднія матчы ў асноўнае, бо гулялі добра і мелі перавагу. Трэба было абыгрываць сапернікаў.
– Папярэдні матч з маскоўскім «Дынама» завяршыўся з лікам 0:1. Якую гульню чакаеце сёння?
– Думаю, будзе такая ж роўная гульня, як і ў папярэдняй сустрэчы з маскоўскім «Дынама». У тым матчы ўсё вырашыў адзін момант. Хачу, каб на гэты раз усё склалася на нашу карысць.
– Вы напэўна знаёмыя з беларускімі гульцамі ў складзе маскоўскага «Дынама». Хтосьці з іх знаходзіцца ў пашыраным ростеры на найбліжэйшы збор нацыянальнай каманды?
– Вядома. І Уладзіслаў Кадола, і Кірыл Гатавец, і Максім Сушко – гэта гульцы, якіх я б сапраўды хацеў убачыць у трэнінг-кэмпе ў снежні. Усе яны – вельмі добрыя хакеісты і сапраўды ўзмоцняць нацыянальную зборную.
– Што вы скажаце пра Аляксандра Скарэнава? Якія яго моцныя бакі, што думаеце пра ягоную будучыню?
– Так, я не сказаў пра яго, адказваючы на папярэдняе пытанне, але я добра знаёмы з Аляксандрам Скарэнавым, бачыў яго ў Мінску, калі ён рыхтаваўся да сезона летам, таксама ён быў у зборнай мінулай вясной. Вядома, ён таксама выдатны, рознабаковы праварукі нападаючы, у яго выдатны атакуючы патэнцыял, набор індывідуальных якасцяў.
Цяпер ён спрабуе замацавацца ў складзе маскоўскага «Дынама», дзе высокая канкурэнцыя. Упэўнены, што гэта зробіць яго толькі лепшым, што ў тым ліку добра для зборнай Беларусі. Таму мы таксама чакаем яго ў ростеры, – сказаў Вудкрафт.
⚽️Чэмпіянат свету-2022 па-беларуску і без VPN! Пампуй дадатак Tribuna.com