Дзмітрый Краўчанка: «Для мяне любая гульня заканчваецца з лікам 1:0 ці 0:1 – то бок перамогай ці паразай. Лічбы на табло другасныя»

Галоўны трэнер жлобінскага «Металурга» Дзмітрый Краўчанка выказаўся пасля перамогі над салігорскім «Шахцёрам» (5:4) у матчы Экстралігі.

– Напружаны і драйвовы матч. Магу сказаць так: палявыя і брамнікі гулялі асобна, у нас так дакладна. Усё хацелі перамагчы, да апошняй секунды не было зразумела, як усё складзецца. Галоў шмат забілі, але тут паўтаруся: палявыя не дапамагалі, брамнікі… святы даўно мінулі, час у гульні быць. Яны былі моцна асобныя. Рады перамозе!

Дзякуй нашым заўзятарам, прыемна бачыць іх на кожнай выязной гульні сезона. Да Мінска, упэўнены, таксама дабяруцца. Гэта сапраўды важна, калі на чужой арэне за цябе хвалююцца, заўзеюць.

– Шмат падзей было ў матчы: галы, выдаленні, камбэкі.

– Абедзве каманды незалежна ад пазіцый у табліцы аддаваліся, імкнуліся паказаць змястоўны хакей. Мы ўсё ж такі гуляем для гледачоў, яны прыходзяць на арэны, каб атрымаць эмоцыі. Сёння заўзятары абедзвюх каманд атрымалі іх у дастатку.

– Трымалі ў розуме мінулы прыезд у Салігорск?

– Наогул не, сённяшні матч з гэтым не звязаны ніяк. Для мяне любая гульня заканчваецца з лікам 1:0 або 0:1 – то бок перамогай або паразай. Лічбы на табло другасныя. «Шахцёр» – доследная, майстравітая каманда, добры трэнер, ідзе пастаяннае кадравае падсілкоўванне. Цяжка перамагаць такога суперніка. Мы з павагай ставімся да ўсіх каманд.

– З чым звязваеце вялікую колькасць штрафу?

– Думаю, нервы – хто каго больш вывеў з раўнавагі. Казаў пра гэта спартсменам. Дзесьці мы гэтым скарысталіся, дзесьці нам пашчасціла – шайба па стужачцы хадзіла.

– Хутка памянялі Бальшакова. Адчулі неабходнасць?

– Я б іх наогул у гумовую лодку пасадзіў абодвух і адправіў куды-небудзь паплаваць – расслабіцца, супакоіцца :) Проста вось на раз прыйшло такое рашэнне.

– Эмацыйнае?

– Не, я чалавек спакойны. Далі Сяргею адпачыць крыху. Потым Рамана хацелі памяняць зваротна, але адна сітуацыя мяне спыніла. Убачыў, што ўсё нармальна, і думаю: ну добра, няхай гуляе :), – адзначыў Краўчанка.