Андрэй Стась: «Нягледзячы на тое што я самы ўзроставы ў мінскім «Дынама», не адчуваю сябе на 35 гадоў»
Капітан мінскага «Дынама» Андрэй Стась распавёў пра сваю ролю ў маладым калектыве.
– На цырымоніі закрыцця сезона вам уручылі статуэтку «Баця». Прыемна было атрымаць такі незвычайны прыз?
– Безумоўна. Хоць я самы ўзроставы ў калектыве, не адчуваю сябе на 35 гадоў. Заўсёды стараюся дапамагаць маладым гульцам парадамі. Асабліва – Сацішвілі і Кузняцову, з якімі часта выходзіў у адным звяне.
– На выніковай прэс-канферэнцыі адзначалася, што больш за 20 гульцоў маюць кантракты на будучую кампанію. У тым ліку пагадненне дзейнічае ў вас і многіх ключавых выканаўцаў. Ці азначае гэта, што «зубры» проста абавязаны фінішаваць вышэй восьмага месца ў «рэгулярцы»?
– Захаванне касцяка – гэта добрае рашэнне кіраўніцтва. Прысутнасць знаёмых хакеістаў у складзе павінна даць плён у будучыні. Пакуль не стану гаварыць гучных слоў. Калі б завяршылі чэмпіянат на больш высокім месцы, чым восьмае, то трапілі б на ўмоўны «Лакаматыў». І, мабыць, такой упартай барацьбы не атрымалася б, – сказаў Стась.
