Яшчэ нядаўна Сабаленка хвалілася калье ад Кальцова і казала, што мае хлопца, а аказалася, што да трагедыі яны разышліся
Зусім нечаканае.
Амаль двое сутак спатрэбілася Арыне Сабаленка, каб адрэагаваць на смерць чалавека, з якім была разам амаль чатыры апошнія гады. Увесну 2020-га стала вядома, што былы гулец зборнай Беларусі па хакеі сышоў ад жонкі да тэнісісткі. У ноч з 18 на 19 сакавіка 2024-га Кальцова не стала – ён выпаў з 23-га паверха гатэля St. Regis Bal Harbour Resort у Майамі (для паліцыі прыярытэтнае тлумачэнне здарэння – самазабойства).
Спярша па сітуацыі выказалася адна з найлепшых сябровак беларускай тэнісісткі – яе калега-суперніца па корце Паўла Бадоса. Іспанка заявіла, што ведае ўсю сітуацыю, аднак дэталі паведамляць адмовілася, бо дала такое абяцанне Сабаленке. Ну а праз некалькі гадзін тая сама выступіла з заявай у сваіх сацыяльных сетках: папрасіла паважаць яе прыватнае жыццё і назвала тое, што здарылася, трагедыяй, але больш за ўсё здзівіла паведамленнем, што яны з Кальцовым больш не былі разам.
А яшчэ нядаўна Сабаленка і Кальцоў выглядалі шчаслівай парай, а словы тэнісісткі на смерць, як аказалася, былога бойфрэнда – першая публічная заява пра расстанне.
На 14 лютага гэтага года закаханы хакеіст парадаваў сваю дзяўчыну дарагім падарункам – калье ад брэнда Cartier за 9 тысяч еўра, чым яна пахвалілася ў сябе ў інстаграме:
А яшчэ расійскі хакейны аглядальнік Павел Лысенкоў у сваім тэлеграм-канале падзяліўся скрыншотам, на якім Сабаленка называе Кальцова «каханым», а той ёй адказвае смайлікамі ў выглядзе сэрца. Экраннае фота нібыта зробленае два тыдні таму:
Мяркуючы па інтэрфейсе, гэта скрын з інстаграма, але ў Сабаленкі такога паста ў публічным акаўнце на сёння няма. Кальцоў вёў закрыты інстаграм, а ў тэнісісткі яшчэ ёсць другая старонка, доступ да якой абмежаваны.
Зрэшты, нешта дзіўнае пра сваё прыватнае жыццё Сабаленка сказала яшчэ 10 сакавіка. Праўда, выглядала гэта як абмоўка. У інтэрв'ю падчас турніру ў Індыян-Уэлсе (ЗША), расказваючы пра цяжкасці тура, спартсменка згадала разлуку з бойфрэндамі, а не адным бойфрэндам. Сказаўшы гэта, яна весела рассмяялася.
«Самы цяжкі момант у тэнісе – калі ты адчуваеш сябе прыгнечаным, не гуляеш на сваім узроўні. І знаходзішся ўдалечыні ад сваёй сям'і, ад сваіх сяброў, ад сваіх хлопцаў. Ой, божачка, хлопцаў... У мяне толькі адзін! Давайце перазапішам гэта», – сказала Сабаленка.
Сёння кейс Сабаленкі-Кальцова ў дэталях усё больш нагадвае сітуацыю, у якую патрапіла іншая беларуская топ-тэнісістка – Вікторыя Азаранка. У лістападзе 2012-га ўкраінскі тэнісіст Сяргей Бубка, якога на той момант усе лічылі яе хлопцам, выпаў з акна апартаментаў з трэцяга паверха. У адрозненне ад Кальцова, Бубка выжыў і нават спрабаваў вярнуцца ў прафесійны тэніс. Азаранка адведвала ўкраінца ў лякарні, але, як пазней аказалася, што на момант падзення яны ўжо былі не парай, а проста сябрамі:
