Вось хто з беларусаў набiраў нямала балаў у НХЛ да Шаранговiча: 50+ ачкоў у чацвярых, Салей > Кальцоў
Новы рэкорд можна i ўмацаваць.
У рамках рэгулярнага чэмпіянату НХЛ 15 красавіка «Калгары» дома адолеў «Арызону» з лікам 6:5. У канцы другога перыяда беларускi форвард гаспадароў Ягор Шаранговіч закінуў сваю 31-ю шайбу ў сезоне.
Пасля гэтага на рахунку Шаранговiча стала 59 (31+28) ачкоў – такiм чынам, ён пабіў рэкорд па балах у «рэгулярцы» НХЛ сярод беларускiх гульцоў, якi належыў цяперашняму рэжымнiку Міхаілу Грабоўскаму. Той у сезоне-2010/11 у складзе «Таронта» набраў 58 (29+29) ачкоў.
За дасягненнем Шаранговіча на арэне назірала яго сям'я – жонка Дарʼя і сын Крысціян.
Пасля матча Шаранговiч сціпла каментаваў, што самае важнае – перамога, але ўсё ж прызнаўся, што i пра рэкорд памятае.
«Выдатна перасягнуць дасягненне Міхаіла Грабоўскага. Ён – мой вялікі сябар, мы часта стэлефаноўваемся, ходзім на вячэры. Што ж, спадзяюся, зараз Міхаiл патэлефануе мне, бо ён не зрабіў гэтага, калі я зраўняўся з ім па лічбах. Напэўна, да гэтага часу злуецца», – заявiў гулец у студыі клубнага канала, яўна ў жарт сказаўшы апошнюю фразу.
Мы ж узгадаем найлепшыя сезоны беларускiх гульцоў у НХЛ да Шаранговiча.
Кантстанцін Кальцоў
Экс-хакеiст, якi загінуў у сакавіку 2024-га, правёў усе свае тры сезоны ў НХЛ у джэрсі «Пітсбурга». У сезоне-2003/04 ён вызначыўся 29 ачкамі, забіўшы 9 шайб і аддаўшы 20 асістаў за 82 гульнi. А яшчэ ў гэты гульнявы год ён устанавiў антырэкорд беларусаў па каэфіцыенце карыснасці, «-30» – у Шаранговіча гэты паказчык пакуль «-29».
Руслан Салей
Рэкардсмен сярод беларускiх хакеiстаў па колькасці сезонаў у наймацнейшай лізе свету (14) быў абаронцам, што не перашкаджала зарабляць часам немалую колькасць балаў. У сезоне-2006/07 легендарны гулец набраў 32 ачкі ў 82 гульнях «Фларыды» – 6 шайб і 26 асістаў.
Сяргей Касціцын
Гэты форвард добра паказваў сябе ў сезоне-2010/11. У форме «Нэшвіла» Касціцын-малодшы набраў 50 ачкоў за рэгулярны сезон – забіў 23 шайбы і аддаў 27 перадач у 77 гульнях. «Прэдатарз» тады выйшлі ў плэй-оф, дзе беларускі форвард дадаў да сваёй статыстыкі яшчэ пяць асiстаў.
Уладзімір Цыплакоў
Для гэтага форварда, якога не стала ва ўзросце 50 гадоў у 2019-м, самым вынiковым у НХЛ аказаўся сезон-1997/98 за «Лос-Анджэлес Кінгз». Цыплакоў выходзіў на лёд у 73 матчах «рэгуляркi», у якіх набраў 52 (18+34) ачкі.
Андрэй Касціцын
У старэйшага з братоў найлепшы сезон – 2007/08. Цяперашнi гулец каманды Лукашэнкi тады за «Манрэаль» набраў 53 (26+27) ачкі у 78 матчах. Каманда прабілася ў плэй-оф, дзе Касціцын правёў яшчэ 12 сустрэч, забіўшы ў іх 5 шайб і аддаўшы 3 асістам.
Дарэчы, у студзені гэтага года Шаранговіч дагнаў Касціцына-старэйшага па колькасці хет-трыкаў у НХЛ.
Міхаіл Грабоўскі
У сезоне-2011/12 форвард спыніўся на адзнацы ў 51 (23+28) ачко, а за год да таго набраў 59. Пра рэкордны сезон форварда мы на днях распавядалi падрабязна.
Шаранговіч яшчэ можа ўмацаваць рэкорд. «Калгары» засталося правесці ў рэгулярным чэмпіянаце два паядынкі: 17 красавіка ў гасцях з «Ванкуверам» і 19 красавіка дома з «Сан-Хасэ». У плэй-оф ужо не трапiць – каманда з 79 ачкамі ідзе на 13-м месцы.