Аляксандр Апейкін: «Прапаганда выдасць адмену абмежаванняў за вынік дзейнасці рэжыму. Маўляў, гэта перамога Лукашэнкі ці Пуціна, яны дабіліся свайго»
Выканаўчы дырэктар Беларускага фонду спартовай салідарнасці Аляксандр Апейкін распавёў для «Трыбуны» як магчымым допускам беларускіх атлетаў на міжнародныя спаборніцтвы можа скарыстацца прапаганда ў Беларусі і Расіі.
– 22 сакавіка выйшла інтэрв'ю кіраўніка Міжнароднага алімпійскага камітэта Томаса Баха, дзе ён прама заявіў, што МАК не з'яўляецца пасярэднікам у палітычных пытаннях. Гэта тонкі намёк на тое, што камітэт мае намер пакінуць у сіле студзеньскае рашэнне, і будзе заклікаць спартовыя федэрацыі ўсяго свету дзейнічаць па рэкамендацыях МАК. Ну а другая аснова для маіх слоў – гэта ўласныя інсайды з колаў алімпійскага руху. І атрыманыя даныя пацвярджаюць думкі аб тым, што спартсменаў Беларусі і Расіі дапусцяць да спаборніцтваў.
– Верагоднасць практычна 100-працэнтная?
– Так.
– І што вы думаеце на гэты конт?
– Шчыра кажучы, асаблівай рэакцыі ў мяне не было, таму што проста пацвердзілася тое, што МАК будзе і надалей прытрымлівацца свайго рашэння, прынятага ў студзені 2023 года.
– Беларускія чыноўнікі негатыўна настроены да нейтральнага сцяга.
– Спартсмены паедуць на спаборніцтвы, я ўпэўнены. Тым больш Аляксандр Лукашэнка, па-мойму, нядаўна сказаў, што не важна, пад якім сцягам, бо «сцяг ён у сэрцы».
Спартсменам, думаю, пофіг. Яны едуць не прадстаўляць краіну, а рэалізоўваць сябе. Многім, не выключаю, будзе нават камфортней выступаць у нейтральным статусе, чым бегаць пад чырвона-зялёным сцягам і асацыявацца з краінай, якая выступае суагрэсарам у вайне.
– Можна сказаць, што рашэнне МАК - на карысць спартсменаў, якія прадстаўляюць рэжым?
– Рашэнне МАК, вядома, дастаткова паспешнае ў бягучых умовах. Гэтая сітуацыя можа быць выкарыстаная прапагандай, якая выдасць адмену абмежаванняў за вынік дзейнасці рэжыму. Маўляў, гэта перамога Лукашэнкі ці Пуціна, яны дабіліся свайго. Але я б усё роўна не называў гэта перамогай. Чаму? Атлеты ж будуць прадстаўляць не краіны, а саміх сябе. І рэжымам ад гэтага лягчэй не стане, – сказаў Апейкін.
