Лукашэнка дапамог Сабаленцы ў 2018 годзе скасаваць кантракт з яе агентам («ЧестнОК»)

У новым выпуску на YouTube-канале «ЧестнОК» Яраслаў Пісарэнка распавёў падрабязнасці сустрэчы Арыны Сабаленка і Аляксандра Лукашэнкі, якая ў 2018 годзе была арганізаваная па ініцыятыве тэнісісткі.

«У мінулым сваім выпуску я расказваў пра тое, як Сабаленка сама папрасілася на аўдыенцыю да Лукашэнкі, гэта было ў 2018 годзе. Яна ўжо падыходзіла да топ-10, выступала вельмі выдатна, усё прадракалі ёй вялікую спартовую кар'еру, вялізныя прызавыя, кучу трафеяў.

Але яшчэ раней Сабаленка зрабіла адну памылку, якая ў цэлым уласцівая маладым спартоўцам, яна звязалася папросту не з тымі людзьмі. Да свайго ўзлёту ў 2018 годзе яна падпісала кантракт з нейкім расійскім агентам, яго імя я так і не змог даведацца, гавораць нават у федэрацыі тэніса гэтая тэма паўзабароненая нават у асабістых размовах.

Нельга нічога даведацца і ў Google, хто менавіта прадстаўляў Сабаленку да 2018 года. Вось інтэрв'ю з яе тагачасным трэнерам Дзмітрыем Турсунавым. Размова была апублікаваная ў 2018 годзе, за месяц да таго самага візіту Сабаленкі да Лукашэнкі. У Турсунова спыталі, хто ж агент Сабаленка. На што ён адказаў, што гэта трэба даведацца ў яе. Неяк дзіўна думаць, што трэнер Сабаленкі не ведае, хто яе агент.

Але ў любым выпадку, гэты чалавек не публічны, яго імя ці наўрад вам пра штосьці скажа. Дык вось, гэты агент першым разгледзеў талент Арыны і заключыў з ёй кантракт. Па ягоных умовах ён стаў спонсарам Сабаленкі. За яго рахунак яна каталася на спаборніцтвы, ён аплачваў ёй пражыванне і гэтак далей. Але што гэта за кантракт, яна адчула крыху пазней, калі ў яе пачаліся самавітыя прызавыя, але яна іх па факце не бачыла.

Гэта значыць, па ўмовах ёй аплачвалі ўсе выдаткі, але прызавыя сыходзілі таму самаму агенту. Я не ведаю дакладных лічбаў, але кажуць, што Сабаленка атрымлівала мінімальны працэнт прызавых за свае перамогі. І сам па сабе кантракт быў вельмі доўгатэрміновы, то бок гэта не год і не два, а значна больш. Па факце перад ёй вісела перспектыва, што за свае лепшыя спартыўныя гады яна не заробіць практычна нічога.

І ў прававым полі яна вырашыць гэтае пытанне не магла. Вось кантракт, вось умовы, вось абавязацельствы, ну куды тут дзявацца.

У 2017 годзе Лукашэнка ўжо заўважыў Сабаленку падчас матчаў жаночай зборнай на Кубку Федэрацыі. У іх там была нават сустрэча ў раздзявальні. Сабаленка сапраўды тады згуляла вельмі крута і дапамагла зборнай Беларусі выйсці ў фінал турніру. І менавіта гэтай сувяззю яна вырашыла скарыстацца, каб вырашыць пытанне са сваім кантрактам.

Па маёй інфармацыі, пасярэднікам сустрэчы Лукашэнкі і Сабаленкі стаў Аляксандр Шакуцін. Чалавек, вельмі набліжаны да Лукашэнкі, яго называюць кашальком Лукашэнкі. Таксама раней ён быў старшынём фэдэрацыі тэніса Беларусі і, у прынцыпе, заўсёды быў вельмі блізкім да беларускага тэнісу.

І вось на гэтай сустрэчы, недзе за зачыненымі дзвярыма, Сабаленка і выклала ўсе свае праблемы Лукашэнку. Ізноў-ткі, вырашыць сітуацыю ў прававым полі было немагчыма, але знайшліся іншыя рычагі ўздзеяння.

Крыніцы паведамляюць, што той самы агент быў сапраўды нячысты на руку, не канкрэтна ў сітуацыі з Сабаленкам, а ўвогуле. І на яго была заведзеная крымінальная справа ў Расіі па артыкуле «махлярства». Вырашылі гэтае пытанне дастаткова проста, нічога такога звышнатуральнага не выдумлялі. Проста агенту далі зразумець, альбо ты раздзіраеш кантракт Сабаленкі, альбо мы выдаем цябе ў Расію, дзе цябе чакае суд.

І, здаецца, тут выбар дастаткова відавочны. І вось тут Сабаленка пазбавілася ад сваіх кайданоў, але набыла іншыя», – распавёў Пісарэнка.