Першы матч Сабаленка пасля смерці Кальцова: у чорным з рэдкай кепкай выйграла ў сяброўкі і ўсміхалася пасля

22 сакавіка беларуская тэнісістка Арына Сабаленка праводзіла стартавы для сябе матч на турніры ў Маямі. Пачаўся ён значна пазней, чым планавалася. Першапачаткова гульня стаяла ў графіку 21 сакавіка, але арганізатары пасунулі яе на дзень пасля навіны пра смерць Канстанціна Кальцова. Тады яшчэ думалі, што гулец каманды Лукашэнкі – бойфрэнд Сабаленка, але пазней тэнісістка заявіла, што паспела расстацца з экс-хакеістам. Здарылася гэта незадоўга да таго, як ён упаў з балкона шыкоўнага гатэля ў прыгарадзе Маямі.

Не атрымаў разліку ў клубе, пустыя бутэлькі, планы на будучыню. Што вядома на другі дзень пасля смерці Кальцова

Яшчэ нядаўна Сабаленка хвалілася калье ад Кальцова і казала, што мае хлопца, а аказалася, што да трагедыі яны разышліся

Але і 22 сакавіка матч другой ракеткі свету своечасова не пачаўся – ужо з-за дажджу, пры якім гуляць было немагчыма. У выніку гульня стартавала праз шэсць гадзін ад намечанага.

Фота: twitter.com/ALaboutSports

Сабаленка выйшла на матч, як і на трэніровачныя сесіі да яго, ва ўсім чорным. Часам рэжымніца і да таго гуляла ў такім колеры, але часцей за ўсё выбірала больш яркія – вось яе свежыя лукі з нядаўніх турніраў.

Ды і цяпер на Сабаленка была кепка. А кепка на Сабаленка падчас матча – гэта, паверце, вялікая рэдкасць.

Цяперашняя саперніца Сабаленка таксама выбрала чорны ўбор – хіба што каўнер быў ружовы. Дамовіцца пра такое тэнісісткам дакладна было нескладана. Па другі бок сеткі апынулася іспанка Паўла Бадоса (№ 80 WTA) – адна з найлепшых сябровак Сабаленка. Неўзабаве пасля смерці Кальцова Бадоса заявіла: «Я ведаю ўсю сітуацыю. Нічога не буду казаць. Арына – мая найлепшая сяброўка, і я ёй абяцала».

Сама гульня прайшла без сюрпрызаў. Сабаленка пацвердзіла статус фаварыткі: дапусціла 26 нявымушаных памылак, але ні разу не аддала сваю падачу, 76% мячоў падала з першай спробы пры трох эйсах і чатырох двайных. Біла як заўсёды магутна і крычала як заўсёды гучна. У пачатку другога сэта ў некалькіх момантах запар паказала поўную стрыманасць пры вырашальных ударах (адзнака 2:15).

У Бадосы быў усяго адзін брэйкпойнт – але на ім Сабаленка згуляла так трапна, што яе сяброўка бяссільна апусцілася на калені (адзнака 3:23).

У выніку Сабаленка выйграла 6:4, 6:3 за менш чым паўтары гадзіны. Ля сеткі яны з Бадосай абняліся, перакінуліся парай слоў – і пераможца заўсміхалася (адзнака 4:22).

Сабаленка выйшла ў 1/16 фіналу, дзе сустрэнецца з украінкай Ангелінай Калінінай (№ 36 WTA). Наўрад цi там усё будзе настолькі прыязна.

Калініна пра тое, што не паціснула руку расіянцы Кудзярметавай: «Наогул яе краіна напала на Украіну»

Украінская тэнісістка Калініна: «Бомба ўпала побач з кватэрай маіх бабулі і дзядулі ў Новай Кахоўцы. Яны прачнуліся і зразумелі, што трэба з'яжджаць»