Валерый Ісаеў: «У мяне час ад часу ўзнікае адчуванне, што Базанаў узначаліў федэрацыю толькі дзеля таго, каб хадзіць бясплатна на матчы»
Футбольны агент Валерый Iсаеў паразважау наконт таго, што дало беларускаму футболу правядзенне чэмпіянату у перыяд пандэміі каронавіруса.
– Праз каранавірус спыніліся ўсе футбольныя турніры ў Еўропе, акрамя беларускага. Як вы паставіліся да таго, што ў нашай краіне гуляць працягвалі?
– Варта прызнаць, што футбольная грамадскасць на нашым прыкладзе ўбачыла, што падчас пандэміі чэмпіянат можа працягвацца. І, безумоўна, мы згулялі пэўную ролю ў тым, каб чэмпіянаты ў іншых краінах у пэўны момант аднавіліся. Не буду хаваць сваю эгаістычную пазіцыю. Для мяне як для заўзятара, а не менеджара, гэта быў плюс. Футбалісты і гледачы тады не хварэлі, можна было гуляць. Зараз не магу сказаць, ці правільнае прынялі тады рашэнне. Мы не ведаем сапраўдную карціну захворвання на каранавірус і колькасць смяротных выпадкаў. З іншага боку, паўтаруся, на нашым прыкладзе сусветнае футбольнае і спартыўнае грамадства ўбачыла, што можна праводзіць спаборніцтвы з улікам жорсткіх мер бяспекі.
У нашых чыноўнікаў, безумоўна, сваё стаўленне да пандэміі. Я глядзеў выступленні міністра аховы здароўя, і ніколі ад яго не чуў спачуванняў медыкам і родным памерлых ад кавіду. А ў інтэрнэце неяк ўбачыў відэа, на якім іспанскі чыноўнік зачытваў спісы памерлых дактароў і медсёстраў, якія паклалі свае жыцці на барацьбу з гэтай хваробай, і гэта было вельмі кранальна. Але мы нават у падобнай сітуацыі не можам зрабіць правільныя высновы. Праз каранавірус у Беларусі памерла шмат футбольных людзей. Напрыклад, старшыня наваполацкага «Нафтана» Леанід Падліпскі і былы трэнер гродзенскага «Нёмана» Сяргей Няфёдаў. Аднак кіраўнік футбольнай федэрацыі Уладзімір Базанаў заяўляе, што галоўным дасягненнем сёлета стала тое, што беларускі чэмпіянат праз пандэмію не спынілі. Шчыра кажучы, калі і вешаць камусьці «ордэн» за гэта, дык дакладна не кіраўнікам федэрацыі. Мы ведаем, што не яны прымалі рашэнне, працягваць чэмпіянат ці не. Зараз не тая сітуацыя, каб падобным наогул можна было б ганарыцца. І калі ты ўжо прыгадаў вірус, дык можна было прыгадаць тых, каго праз гэтую заразу няма з намі, і ўшанаваць іх памяць хвілінай маўчання. Ну ў нас ставяцца да падобнага вось так. Мы будзем ганарыцца тым, што нам тэлефанавалі з УЕФА, казалі, што мы малайцы, а смерць абсалютна здаровага Падліпскага не такая істотная ў агульных працэсах. Але я стаўлюся інакш. Што здарылася цудоўнага, калі мы падчас каранавіруса працягвалі чэмпіянат? Ці з’явіўся інтарэс новых інвестараў да клубаў і ліг? Ці пачалі мы будаваць эканомныя і кампактныя стадыёны ў гарадах? Ці лепш стала прадавацца атрыбутыка клубаў? Ці ўзмацніўся інтарэс да нашых футбалістаў за мяжой? Не. Мы зрабілі добрую справу для футбольных аматараў з розных краін, бо не было чаго глядзець, але ж сёння пра нас нават не ўзгадваюць.
– Базанаў лічыць, што наш чэмпіянат паказалі па расійскім тэлеканале «Матч ТБ» — і гэта файна.
– Але што гэта дало нашаму першынству? Мы проста ўпэўніліся ў тым, што на наш чэмпіянат нішто не можа паўплываць і ён будзе праводзіцца пры любых умовах.
Футболам трэба займацца інакш. Кіраўнік федэрацыі кажа, што зборная ў 2020-м выступіла нармальна, і асноўны крытэрый у ацэнцы трэнерскага штаба нацкаманды, на яго думку, было тое, што яны наведвалі матчы чэмпіянату Беларусі. Паслухай, а што яшчэ рабіць трэнерам?! Базанаў, дарэчы, таксама ездзіў на гэтыя матчы. І гэта, відаць, добра, бо ён цікавіцца футболам, але ў мяне час ад часу ўзнікае адчуванне, што ён узначаліў федэрацыю толькі дзеля таго, каб хадзіць бясплатна на матчы. А кіраўнік федэрацыі мусіць займацца зусім іншым – шукаць новыя крыніцы для фінансавання зборнай і клубаў, ствараць умовы, каб футбол станавіўся больш прывабным для інвестараў і партнёраў, – сказаў Iсаеў.
