Валерый Iсаеў: «Нам, заўзятарам, ніхто так і не растлумачыў, чаму Мархеля прызначылі на пасаду галоўнага трэнера. За якія заслугі?»

Футбольны агент Валерый Iсаеў падзяліўся меркаваннем з нагоды гульні зборнай Беларусі.

– Апошнія вынікі зборнай звязаны з працай галоўнага трэнера Міхаіла Мархеля, які да нацыянальнай каманды амаль не працаваў на высокім узроўні. Лічыце, што ён вельмі камфортны для федэрацыі трэнер, за якога ўсё вырашаюць?

– Безумоўна. Хто зараз адказвае за вынікі зборнай? Кіраўнік федэрацыі і ягоныя намеснікі, якія вызначаюць развіццё футбола ў нашай краіне, вырашаюць, хто будзе трэніраваць зборную. Відавочна, што яны прызначылі трэнерскі штаб, які будзе пакорліва выконваць усе, што скажуць. У зборнай няма вынікаў, а яны за гэта нават не перажываюць. Галоўнае, што трэнеры наведваюць матчы чэмпіянату. Нам, заўзятарам, ніхто так і не растлумачыў, чаму Мархеля прызначылі на пасаду галоўнага трэнера. За якія заслугі? Ён жа акрамя маладзёжных камандаў амаль нікога не трэніраваў. Аднак ён не толькі ўзначаліў зборную, але і прывёў у трэнерскі штаб свайго брата, у якога няма нармальнага досведу працы памочнікам нават у першай лізе. Гэта што яшчэ за прызначэнні? Мы ж кажам пра нацыянальную зборную краіны. Ладна, калі б быў вынік… Усе разумеюць, навошта прызначылі Мархеля.

– Хто замест Мархеля мог бы зараз узначаліць зборную?

– Не гатовы адказаць на гэтае пытанне. Проста не ведаю, хто сёння, калі ў грамадстве і спорце адбываюцца вядомыя рэчы, на сябе гатовы ўзяць такую адказнасць, – лічыць Iсаеў.