У «Шахцёры» ўжо перапісваюць маёмасць. Банкруцтва – лагічны крок, але не факт, што яно адбудзецца, нягледзячы на даўгі ў 8 млн долараў
Два месяцы пра гэта думаюць.
Скандал з дамоўнымі матчамі, затрыманне кіраўнікоў, штраф у 370 тысяч рублёў, зняцце 50 пунктаў (30 у чэмпіянаце-2023 і 20 у чэмпіянаце-2024), пазбаўленне еўракубкавай пуцёўкі і звання чэмпіёна. Так жыве «Шахцёра» сёлета, але далей таксама можа быць цікава. Бо апроч гэтага ў футбольнага Салігорску ёсць іншы багаж – шматмільённыя даўгі ў доларавым эквіваленце, і ў клубе актыўна думаюць, як ад яго пазбавіцца. На днях быў агучаны элегантны сцэнар – банкруцтва. «Трыбуна» даведалася, ці вядзецца да яго рэальная падрыхтоўка (вядзецца), і як на тое, што адбываецца, рэагуюць футбалісты.
Пачалі перапісваць актывы
Яшчэ ў студзені 2023-га мы пісалі пра тое, што «гарнякі» адчуваюць сурʼёзныя фінансавыя праблемы і ўгразлі ў даўгах. Прычым не толькі перад футбалістамі, але і іншымі арганізацыямі. Напрыклад, доўгі час клуб, прыязджаючы на матчы ў Мінск, сяліўся ў гасцініцы «Вікторыя», але калі стала няма чым плаціць, пачаў «аплочваць» пражыванне гарантыйнымі лістамі. Маўляў, сёння мы пажывем, а потым усё вернем. «Вікторыі» у нейкі момант гэта надакучыла (клуб парушаў свае абавязанні па вяртанні даўгоў), і гасцініца высунула ўмову: ці плаціце, ці шукайце іншае месца. «Шахцёр» пераехаў у Mariott. Там сітуацыя паўтарылася – зноў былі скарыстаныя тыя ж гарантыйныя лісты.
Па словах нашых крыніц, якія ў курсе сітуацыі, увесь гэты час непасрэднае кіраўніцтва клуба, падпісваючы гарантыйныя лісты для «Вікторыяй» і Mariott, прыкрывалася Іванам Галаватым – лукашэнкаўскім кіраўніком «Беларуськалія» і старшынёй праўлення «Шахцёра». Маўляў, такі важны чалавек ашукваць не будзе, і гатэлі ў гэта верылі – і грошай потым не бачылі. Як атрымалася даведацца, «Шахцёр» дагэтуль не разлічыўся па ўсіх даўгах з «Вікторыяй» і Mariott.
Акрамя таго, у клуба ёсць даўгі за арэнду стадыёна «Будаўнік», які належыць гораду. Па нашай інфармацыі, са шматлікімі гульцамі, у тым ліку з тымі, хто сышоў, ФК да гэтага часу не разлічыўся па заробках за мінулы год. Пра выплату прэміяльных гаворкі нават не ідзе. Пры гэтым, як удалося даведацца, сёлета заробак у камандзе выплачваецца своечасова (зноў жа, без прэміяльных).
Праблема ў тым, што «Шахцёр» доўгія гады жыў у доўг перад многімі структурамі і спартсменамі. І на сёння, паводле нашай інфармацыі, агульная сума запазычанасцей складае каля 8 млн долараў.
У глабальным плане не выправілі сітуацыю паступлення ад УЕФА за ўдзел каманды ў еўракубках мінулага сезону. Па звестках «Трыбуны», гаворка ідзе пра суму ў 1 млн еўра за ўдзел у першым кваліфікацыйным раўндзе Лігі чэмпіёнаў, за дзве гульні ў трэцім кваліфікацыйным раўндзе Лігі канферэнцый плюс бонус ад УЕФА (усе гэтыя грошы ўжо прыйшлі на рахунак).
І вось на гэтым фоне загучалі размовы пра магчымае банкруцтва – маўляў, гэта добрае выйсце для клуба, каб пазбавіцца ад непасільных абавязанняў. Па інфармацыі «Трыбуны», у «Шахцёры» такі сцэнар сурʼёзна сталі разглядаць яшчэ два месяцы таму. У гэты бок падштурхнуў скандал з дзіўнымі матчамі, а таксама цяжбы з былымі гульцамі (напрыклад, да гэтага часу доўжыцца разбіральніцтва з абаронцам Сяргеем Паліцевічам). Менеджмент лічыць банкруцтва лагічным крокам. Гэты крок дазволіць вяртаць пазыкі гадамі, а можа, не вяртаць іх увогуле.
Па нашых звестках, пэўныя працэсы ў гэтым плане ўжо запушчаныя. Клуб перапісвае маёмасць – базу, аўтобус і іншыя актывы – на даччыныя прадпрыемствы «Беларуськалія», каб потым гэтая маёмасць не была спагнаная ў лік пагашэння даўгоў. Па словах крыніц, «перапіс» плануецца завяршыць да канца гэтага года, каб юрыдычная асоба засталася цалкам пустой. І вось тады ўжо будзе запушчаны паўнацэнны працэс банкруцтва.
Як нам удалося даведацца, пад «пераразмеркаванне» патрапілі і работнікі СДзЮШАР «Шахцёр». Трэнеры і звычайныя служачыя пераведзеныя на працу на даччыную арганізацыю «Беларуськалія» «Калійспецтранс». Гэта ўнітарнае прадпрыемства займаецца выкананнем такіх работ, як перавозка пасажыраў, экспартнае і імпартнае транспартаванне грузаў, падʼём грузаў на вышыню і гэтак далей. Супрацоўнікі СДзЮШАР, па нашых звестках, сёння ўжо афіцыйна лічацца працаўнікамі гэтага прадпрыемства: займаюць звычайныя грамадзянскія пазіцыі і атрымліваюць за гэта заробак, насамрэч займаючыся футболам з дзецьмі.
Гаворачы пра банкруцтва «Шахцёра», нашыя суразмоўцы звяртаюць увагу на яшчэ адну дэталь: калі яно сапраўды адбудзецца, то ў незразумелае становішча трапляе фарм-клуб Салігорску – «Шахцёр» з Петрыкава, які знаходзіцца пад той жа юрыдычнай асобай, што і асноўная каманда «гарнякоў».
Па адным са сцэнароў, пры такім раскладзе новае жыццё салігорцы могуць пачаць на базе «Партызана» – яшчэ адной салігорскай каманды, якая выступае ў другой лізе і знаходзіцца пад апекай кампаніі, якая адлучылася з «Беларуськалія».
Наколькі нам вядома, да гэтых размоваў у «Шахцёры» ставяцца цалкам спакойна. Ніхто не выключае, што падзеі будуць развівацца наступным чынам: «Партызан» у гэтым сезоне зноў заваюе пуцёўку ў першую лігу (раней каманда яе дамагалася, але з фінансавых меркаванняў не ішла на павышэнне), і тады на базе гэтага клуба «Шахцёр» сапраўды пачне новае жыццё – з Д2, без даўгоў і без мінусу пунктаў у табліцы. Як кажуць нашыя суразмоўцы, гэта самы хуткі і просты спосаб вярнуць Салігорску еўракубкі.
Цяпер «Партызан» фінансуецца за кошт прадпрыемства «Шахтаспецбуд». Калі ж «Шахцёр» абʼявіць сябе банкрутам і «адродзіцца» на базе «Партызана», то, паводле слоў нашых суразмоўцаў, Галаваты і «Беларуськалій» з высокай доляй верагоднасці возьмуць пад апеку ўжо гэты клуб.
Што пра ўсё гэта думаюць у «Шахцёры»?
Ні трэнеры, ні гульцы пакуль ніяк не каментавалі апошнія навіны. Аднак нам удалося даведацца пра настроі ў калектыве. Каманда пра сітуацыю з даўгамі даведваецца выключна са СМІ. Як адзначаюць нашыя суразмоўцы, ніхто з прадстаўнікоў кіраўніцтва ні разу не прыходзіў на трэнаванні і не расказваў пра тое, у якую сітуацыю патрапіў «Шахцёр» і да чаго ўсё гэта можа прывесці.
Нягледзячы на гэта, калектыў сканцэнтраваны на працы, а яе хапае – трэба выбірацца са дна табліцы і ліквідаваць мінус у пунктах. Зрэшты, часам у распранальні праскокваюць размовы пра тое, што клуб можа знікнуць. Некаторыя ўжо цяпер думаюць пра варыянты працягу карʼеры, а сённяшні «Шахцёр» разглядаюць як магчымасць зарэкамендаваць сябе перад іншымі працадаўцамі.
Некаторыя сябры каманды разумеюць логіку банкруцтва «Шахцёра» – і ў нейкай ступені рыхтуюць сябе да гэтага. Напрыклад, усведамляюць, што недаатрымаюць пэўную частку грошай па кантрактах. Калі, вядома, у Салігорску ўсё ж такі вырашацца на самаліквідацыю.
