Экс-футбалiст «Дынама», здаецца, забыў, як гуляў у групе еўракубкаў – вось здзiвяцца словам пра БАТЭ ў Мiнску!
«Боскi смак» кудысьцi знiк.
2023 год склаўся паспяхова для «Тарпеда-БелАЗ»: у траўнi каманда заваявала свой другі ў гісторыі Кубак Беларусі, абыграўшы ў фінале БАТЭ, а ў ЧБ таксама ў другi раз узяла бронзавыя медалi. У апошнiм туры iх маглi адабраць «Iслач» ды той жа БАТЭ, але не змаглi выйграць свае матчы – i жодзiнцы пасля паражэння ад мiнскага «Дынама» не сумавалi, а радавалiся.
Усе апошнiя поспехi каманды (уключна з бронзай-2020) заспеў i яе цяперашнi капiтан Кірыл Прамудраў. 31-гадовы гулец правёў у камандзе ўжо пяць сезонаў, а нядаўна паспеў прадлiць кантракт яшчэ на год ды даць iнтэрв'ю наконт таго, як прайшоў 2023-i. Для самога Прамудрава ўсё было добра – ён гуляў на пазiцыях цэнтрдэфа ды апорнiка, а «Тарпеда-БелАЗ» прапусцiла менш за ўсiх у сезоне (толькi 18 мячоў). Але ж i забiтых аказалася не так шмат – толькi 33, наконт чаго лiдар жодзiнцаў падумаў пра нядобрыя сiлы: «Нібы стваралі нямала момантаў па ходзе матчаў, а мяч у вароты не ішоў. Можа, нас хто сурочыў?».
Адзначым, што сам Прамудраў двумя галамi ў 27 матчах прынёс свайму клубу вельмi важныя чатыры ачкi на фiнiшнай прамой вышэйшай лiгi. 20 кастрычнiка капiтан ужо ў дададзены час выратаваў для «Тарпеда-БелАЗ» нiчыю (1:1) з «Нёманам».
А 28 кастрычнiка дакладны штрафны ўдар Кiрыла на 64-й хвiлiне дазволіў «Тарпеда-БелАЗ» перамагчы 1:0 «Шахцёр» у Салiгорску.
А вось у згаданым iнтэрв'ю Прамудраў адзначыўся перлам. Частка гутаркi была прысвечана выступу «Тарпеда-БелАЗ» у адборы Лігi канферэнцый, дзе клуб у стартавым жа раўндзе вылецеў ад кіпрскага АЕК (2:3, 1:1), i пасля ўспамiнаў пра тыя матчы гулец атрымаў пытанне, цi не зайздросцiлi ў Жодзiне БАТЭ ды «Нёману», якiя затрымалiся ў еўракубках-2023 на большы час (хоць i не прайшлi квалiфiкацыю).
«Канешне, хочацца як мага больш паварыцца ў гэтай атмасферы, правесцi шмат матчаў. На жаль, амаль для ўсіх беларускіх каманд удзел у еўракубках не выходзіць за межы некалькіх раўндаў кваліфікацыі. Толькі БАТЭ пагуляў у групавым этапе, адчуў боскі смак футбола на такім узроўні. Тарпедаўцы проста намагалiся насалоджвацца момантам», – сказаў Прамудраў.
Што ў гэтых словах не так? Ды проста, мяркуючы па iх, футбалiст забыўся на частку сваёй кар'еры. Дарэчы, яе заўжды можна ўспомнiць у адмысловым раздзеле «Кар'ера» па тэгу гульца на «Трыбуне» (СПАСЫЛКА).
Дык вось, з беларускiх каманд не толькi БАТЭ гуляў у групе еўракубкаў – таксама туда трапляла мiнскае «Дынама», якое выступала на групавым этапе Лiгi Еўропы ў 2014-м i 2015-м. I да другога поспеху Прамудраў мае непасрэднае дачыненне – летам 2015 года ён як раз перайшоў з брэсцкага «Дынама» ў мінскае за 65 тысяч долараў. I ўжо другiм матчам для тады маладога паўабаронцы ў новым клубе стаў паядынак, у якiм i вырашаўся лёс пуцёўкi ў групу – Прамудраў выйшаў на 84-й хвiлiне гасцявой гульнi супраць аўстрыйскага «Рэд Була», якi вёў 2:0 (але ў першым матчы «Дынама» перамагло з такiм жа лiкам). У вынiку пасля асноўнага i дадатковага часу дайшло да серыi пенальцi. Там навiчок да мяча не падыходзiў, а героем стаў Александр Гутар, якi здзейснiў тры сэйва запар. З гэтым Прамудраў (№ 5) павiншаваў кiпера адным з першых.
Непасрэдна ў групе Прамудраў згуляў у апошнiх чатырох матчах – поўнасцю правёў абедзве няўдалыя сустрэчы з «Вільярэалам» (0:4 у гасцях, 1:2 дома) i адзiную для дынамаўцаў на той стадыi пераможную супраць «Вікторыі Пльзень» (1:0 дома), а таксама быў заменены на 61-й хвiлiне гульнi з «Рапідам» (1:2 у гасцях).
З трыма ачкамi i рознiцай мячоў 3:11 «Дынама» тады скончыла на чацвёртым месцы ў групе – але ж «боскі смак футбола» Прамудраў зведаў, прычым без згаданага iм цяпер БАТЭ.
