Гэтыя клубы пакуль у каматозе: багата страт – і амаль няма навічкоў («Шахцёр» і беднякі)
Да чаго гэта прывядзе?
У гэтае міжсезонне футбалістаў губляе не толькі БАТЭ.
Ёсць яшчэ «Арсенал» з Дзяржынска, які мае мінімальныя шанцы атрымаць допуск да ўдзелу ў вышэйшай лізе.
...і калектывы, якія 2023 год правялі ў Д1, але сёння, такое адчуванне, знаходзяцца ў каматозным стане – у асноўным, адтуль паведамляюць пра рост кадравых страт.
«Шахцёр»
2023 салігорскі клуб пражыў, назапашваючы даўгі перад камандай. Справа нават даходзіла да трансфернага бана ў лістападзе-2023 праз запазычанасці перад чатырма футбалістамі. Зʼяўлялася інфармацыя пра некалькі спроб клуба запусціць працэдуру банкруцтва, каб скінуць з сябе фінансавыя абавязанні.
У канцы мінулага гады заснавальнікі «Шахцёра» усё ж такі сталі паціху плаціць па рахунках. Паралельна было запушчанае скарачэнне бюджэту – футбалістам прапаноўваліся новыя кантракты на паніжаных умовах.
На гэта былі згодныя не ўсе. Услед за галоўным трэнерам Аляксеем Багам Салігорск пакінулі паўабаронцы Мікіта Корзун («Елымай», Казахстан), Мікіта Нікалаевіч, нападаючыя Максім Скавыш («Тарпеда-БелАЗ»), Андрэй Салавей («Славія») і Меме Фесу Плака, які хоча вярнуцца ў чэмпіянат Бельгіі.
Пакуль пра падпісанні навічкоў «Шахцёр» нічога не заяўляў, хоць каманда выйшла з адпачынку 8 студзеня. Пра зняцце забароны на рэгістрацыю новых футбалістаў таксама не паведамлялася, хаця тэарэтычна гэта ніяк не перашкаджае падпісваць кантракты. Галоўны трэнер Станіслаў Сувораў цяпер знаходзіцца ў актыўным пошуку. У пятніцу клуб паведаміў пра семярых футбалістаў на праглядзе. Чатыры маюць беларускія пашпарты – абаронцы Канстанцін Кучынскі («Гомель»), Павел Назаранка («Жэтысу», Казахстан), паўабаронцы Дзмітрый Бага («Дынама» Брэст) і Аляксей Анцілеўскі («Тарпеда-БелАЗ»). Яшчэ працуюць расійскія абаронцы Арцём Юран («Сабуртала», Грузія) і Дзяніс Першын (ЦСКА-2, Расія), а таксама італьянец Дыега Лопес, чыя пазіцыя невядомая. Тройка легіянераў паўдзельнічала ў суботнім спарынгу супраць «Слуцка» (1:0). Паводле інфармацыі «Прэсбола», Назаранка і Першын прагляд не прайшлі.
Чэмпіянат-2024 «Шахцёр» пачне з мінусам у 20 пунктаў. Сувораў, нягледзячы на гэта, заяўляе, што на 2024-ы «задачы ў нас будуць самымі высокімі». Салігорцы паспелі згуляць яшчэ і са «Славіяй», якую таксама перамаглі 1:0.
«Мінск»
Фінансавыя цяжкасці «гараджан» даўно не навіна ў белфутболе. Гульцы «Мінска» прывыклі чакаць выплат па даўгах месяцамі. У 2024-м сціплы бюджэт клуба стане яшчэ меншым. Па версіі в.а. старшыні «Мінска» Аляксея Сытова, тут крыецца і прычына расстання з Сяргеем Яромкам. Маўляў, трэнер не змог бы працаваць у сціснутых умовах.
А вось Арцём Чалядзінскі гатовы працаваць з моладдзю і спадзяецца на тое, што маленькія заробкі будуць выплачвацца хаця б своечасова – маўляў, гэта таксама важна.
Фактычна з 10 студзеня Чалядзінскай і яго памочнікі будуюць новую каманду, якая будзе мала падобная на леташнюю. Калі ўзяць топ-8 «Мінска» па гульнявым часе ў 2023-м, то Чалядзінскі можа разлічваць толькі на паўабаронцу Радзівона Пячура, які не супраць зʼехаць у чэмпіянат Расіі, але разумее, што для гэтага трэба нешта спачатку паказаць у беларускай вышэйшай лізе. Астатнія сямёра ўжо абзавяліся новымі клубамі ці знаходзяцца ў пошуку. Абаронца Глеб Якушэвіч за 50 тысяч еўра зʼехаў у «Шыннік» (Расія, Д2). Яго калега па цэнтры абароны Максім Касараб у статусе вольнага агента перабраўся ў брэсцкае «Дынама» (новаму клубу прыйшлося заплаціць кампенсацыю за выхаванне футбаліста). Брамніка Аляксандра Нячаева і паўабаронцу Юлія Кузняцова сватаюць у «Гомель», а хаўбек Глеб Гурбан проста не стаў падпісваць новую дамову. Паўабаронца Данііл Душэўскі і нападаючы Цімафей Мартынаў чакаюць заканчэння кантрактаў з «Мінскам» у сакавіку і займаюцца пошукамі новых варыянтаў.
Для папаўнення страт Чалядзінскі можа разлічваць толькі на ўнутраныя рэзервы і ўчорашніх дублёраў, якія ў 2023-м сталі толькі сёмымі ў сваім першынстве. Таксама ў «Мінск» вярнуліся з арэнды вінгер Ігнат Прановіч і нападаючы Кірыл Забелін, якія нядрэнна зарэкамендавалі сябе ў «Нафтане» і «Дняпры» адпаведна.
«Нафтан»
З канца мінулага сезона ў футбольным Наваполацку ідуць сурʼёзныя змены. «Нафтан» памяняў форму ўласнасці – цяпер гэта не грамадскае абʼяднанне, а дзяржаўная спартовая ўстанова. Сышло ўсё кіраўніцтва клуба, а пасаду старшыні заняў Аляксей Ванько, былы дырэктар раённага фізкультурна-спартыўнага клуба «Прыдзвінне» ў Полацку. Калектыву паабяцалі павялічыць бюджэт удвая, але пакуль што змянілі толькі лагатып – чыноўнікам ён занадта нагадваў сцяг Украіны.
Трэнер Альберт Рыбак у мінулым снежні заявіў пра сваё звальненне з клуба, аднак «новая ўлада» прапанавала яму застацца, і той заключыў кантракт да канца 2024-га. З ім засталіся і ўсе памочнікамі. А вось з футбалістамі справа зусім іншая.
Каманду ўжо пакінула група важных выканаўцаў. Брамнік Аляксей Казлоў і вінгер Кірыл Кірыленка зʼехалі ў «Славію», апорнік Вадзім Курловіч падпісаўся са «Слуцкам», паўабаронца Раман Пілецкі вярнуўся з арэнды ў БАТЭ, а Цімур Пухаў мае намер працягнуць карʼеру ў Казахстане. Гэтыя футбалісты ўваходзілі ў «Нафтан» у топ-8 па гульнявым часе.
Хутчэй за ўсё, не застанецца ў Наваполацку і галоўны бамбардзір Андрэй Панюкоў. Пасля дзевяці галоў у 14 матчах за «Нафтан» расіянін паспрабуе працаўладкавацца ў больш статуснай камандзе. Усяго за гэтую зіму клуб расстаўся з 17 футбалістамі. «Нафтан» пакінулі шэсць легіянераў з сямі (толькі расіянін Георгій Эрмідзі цяпер трэнуецца з дублем).
Пакуль Наваполацк абʼявіў пра падпісанне траіх футбалістаў. Імі сталі брамнік Аляксей Харытановіч, паўабаронца Міхаіл Калядка (абодва – «Белшына») і нападаючы Ягор Шадзько («Дынама» Мінск). Таксама праглядаюцца некалькі гульцоў з расійскага мінора і абаронца Кірыл Коўш з дубля сталічнага «Дынама». У пятніцу «Нафтан» правёў спарынг з «Дняпром», які завяршыўся ўнічыю (0:0).
«Смаргонь»
У мінулым сезоне ў «Смаргоні» хапала праблем. Частка з іх перамясцілася ў 2024 год.
Аднак клуб захаваў, мабыць, свой галоўны актыў – дырэктара Паўла Люцько, якога сваталі на аналагічную пасаду ў «Мінск». Функцыянер ведае падыход да мясцовых чыноўнікаў і раённых прадпрыемстваў, што дапамагала атрымліваць фінансаванне. І сёння Люцько працягвае шукаць грошы.
«Смаргонь» адной з апошніх выйшла з адпачынку, пачаўшы трэнавацца толькі ў мінулы чацвер. Клуб па-ранейшаму не абʼявіў трэнера, які зменіць на пасадзе Ігара Трухава. Першыя заняткі праводзіць Аляксандр Шагойка – адзін з прэтэндэнтаў на вакантны пост.
Трэнінгі праходзяць адразу без дзевяці футбалістаў з леташняга складу. Узімку каманда страціла свайго галоўнага крэатыўшчыка Мацвея Дукса, які вольным агентам пераехаў у брэсцкае «Дынама». Левы край абароны застаўся без Уладзіміра Есіна (вярнуўся ў расійскі мінор).
Са страт гульцоў стартавага складу адзначым сыход цэнтральнага абаронцы Уладзіслава Шубовіча і заканчэнне арэнды форварда Ідрыса Нурадзіна з БАТЭ (на днях нігерыец афіцыйна расстаўся і з Барысавам).
Таксама каманду пакінулі абаронца Уладзіслаў Яцкевіч, паўабаронцы Максім Гаявы (БАТЭ, арэнда), Альберт Капыціч («Нёман», арэнда), Станіслаў Атрашкевіч і нападаючы Уладзіслаў Кабачэўскі (абодва – «Іслач», арэнда).
Што да навічкоў, то пакуль у каманды з райцэнтра нікога. І ні пра якія планы на гэты конт не чуваць.
