Беларуска з драфта WNBA паехала ў Ізраіль за дарослым досведам, але ўсё ідзе не па плане
Вось што адбываецца з Ксеніяй Малашкай.
У сярэдзіне красавіка беларускую баскетбалістку Ксенію Малашку пад агульным 35-м нумарам абралі на драфце жаночай Нацыянальнай баскетбольнай асацыяцыі (WNBA). 23-гадовым форвардам зацікавілася каманда «Чыкага Скай».
Праўда, пакуль дэбют у паўночна-амерыканскай лізе, дзе раней з нашых гуляла толькі Алена Леўчанка, адкладаецца. Маладая спартсменка адправілася за акіян, каб атрымаць дарослы досвед. У пачатку ліпеня Малашка падпісала кантракт з ізраільскай камандай «Рамат Хашарон» з аднайменнага гораду. Разам з калектывам Ксенія рыхтавалася да сезону, які мусіў стартаваць 12 кастрычніка дамашнім матчам у Еўракубку з іспанскім клубам «Герніка Біскайя». Аднак за некалькі дзён да гэтага ХАМАС напаў на Ізраіль, у краіне было абʼяўлена ваеннае становішча, з-за чаго ўсе спартыўныя спаборніцтвы скасаваныя. Перанёсся і старт нацыянальнага першынства. Малашка і яе партнёркі аказаліся ў нявызначанай пазіцыі.
Чаму паляцела за акіян і які клуб выбрала
У сярэдзіне красавіка, дзелячыся эмоцыямі, Малашка адзначала, што выбар на драфце яшчэ не гарантуе месца ў камандзе WNBA. Аднак ужо праз два тыдні беларуска была запрошаная ў перадсезонны кэмп «Чыкага Скай» сярод іншых 18 спартсменак, з якіх павінны былі адсеяць шасцярых для фармавання ростэра на сезон. Малашка магла стаць адной з пяці легіянерак у кэмпе. Пазней мясцовыя журналісты паведамілі, што беларуска на збор не прыехала. Генеральны менеджар клуба з Ілінойса Джэймс Уйэд распавёў, што дзяўчына паступіла ў аспірантуру (вучыцца ва ўніверсітэце Мідл Тэнэсі на проджэкт-менеджара) і вырашыла працягнуць карʼеру ў Еўропе.
10 ліпеня стала вядома, што Малашка зʼехала не ў Еўропу, а на Блізкі Усход – далучылася да клуба з Ізраілю «Рамат Хашарон», падпісаўшы кантракт на год.
Новая каманда беларуска сёння не можа пахваліцца вялікімі дасягненнямі, аднак былі часы, калі ёй не было роўных у нацыянальным першынстве. У перыяд з 1999-га па 2010-ы «Рамат Хашарон» узяў шэсць чэмпіёнскіх тытулаў і столькі ж разоў перамог у Кубку. Пасля вынікі праселі. У сезоне-2022/23 «Рамат Хашарон» фінішаваў у рэгулярным чэмпіянаце чацвёртым з 13 удзельнікаў, адстаўшы ад пераможцы – «Макабі» з Ашдода – на пяць балаў. У плей-оф турніру ўдалося дабрацца да паўфіналу.
Перад сёлетнім сезонам каманду ўзначаліў мясцовы спецыяліст Рой Левін. Да таго ён працаваў у калектыве памочнікам Элі Рабі. Аднак чацвёртае месца ў рэгулярцы і вылет у паўфінале плей-оф не задаволілі кіраўніцтва, і яно памяняла трэнераў пазіцыямі. Па словах тых, хто сочыць за ізраільскім баскетболам, Левін – адзін з баскетбольных топаў у краіне. У свой час працаваў у розных мужчынскіх камандах, браў тытулы і медалі, а апошнія гады сканцэнтраваны на жаночым баскетболе.
Сёння ў «Рамат Хашароне» апроч ізраільцянак сабраныя баскетбалісткі з ЗША, Нямеччыны, Беларусі. Склад – даволі малады. Самая ўзроставая – ізраільцянка Даніэла Крэйнін (28 гадоў). А так сярэдні ўзрост – 23,5 гады. Маладзейшай за 23-гадовую Малашку адразу тры партнёркі.
Па словах Левіна, на запрашэнне Малашкі паўплывала ізраільцянка Дор Саар, якая гуляла з беларускай за ўніверсітэт Мідл Тэнэсі. Па нашай інфармацыі, у ЗША дзяўчыны пасябравалі.
Што паказала беларуска перад сезонам
Малашка прыйшла ў калектыў, як кажуць нашыя крыніцы, на ролю аднаго з лідараў, і ўжо на перадсезонным зборы пачала даказваць, што падпісалі яе нездарма. «Рамат Хашарон» правёў некалькі таварыскіх матчаў з мясцовымі клубамі, рыхтуючыся да чэмпіянату. 2 кастрычніка адолеў удзельніка элітнага дывізіёна «Халон» 66:49, а Малашка стала найлепшым гульцом вечара, набраўшы 19 пунктаў і зрабіўшы 12 падбораў. Пры гэтым перад матчам яна правяла ўсяго пару трэнаванняў.
5 кастрычніка адбыўся спарынг з клубам «Петах Ціква». Там Малашка таксама была навідавоку: 11 пунктаў, 3 перахопы. «Рамат Хашарон» перамог 76:66.
На 7 кастрычніка быў прызначаны таварыскі матч з «Хапаэлем» з гораду Рышон-ле-Цыён, аднак ён не адбыўся.
Старт чэмпіянату адкладзены на нявызначаны тэрмін
У дзень спарынгу на старонцы «Рамат Хашарона» ў Instagram зʼявілася паведамленне аб пераносе матчу, і гэта было цалкам чакана. Раніцай 7 кастрычніка тэрарыстычная групоўка ХАМАС напала на Ізраіль з боку сектару Газа. Ізраіль упершыню з 1973 года ўвёў у краіне ваеннае становішча. Усе забаўляльныя мерапрыемствы сталі неактуальнымі.
На шчасце беларускі і яе аднаклубніц, горад Рамат Хашарон знаходзіцца амаль за 100 кіламетраў ад сектару Газа, таму вялікіх асцярог за бяспеку там няма. Аднак пра аднаўленне матчаў размова пакуль не вядзецца. Тым не менш беларуска працягвае заставацца ў Ізраілі.
На 12 кастрычніка ў «Рамат Хашарона» быў намечаны дамашні матч Еўракубка з іспанскім клубам «Герніка Біскайя», на 16-е – тур нацыянальнага чэмпіянату супраць «Макабі» з Хайфы. Усе гэтыя сустрэчы перанесеныя на пазнейшы тэрмін, які пакуль застаецца нявызначаным як для клубаў, так і для кіраўніцтва лігі. Усё залежыць ад найдалейшай сітуацыі ў Ізраілі, дзе па-ранейшаму дзейнічае ваеннае становішча. Больш за тое, ужо афіцыйна скасаваныя матчы, што намечаныя на 23 кастрычніка. У гэты дзень «Рамат Хашарон» павінен быў сустракацца з «Хапаэлем» з Рышон-ле-Цыёна.
Што тычыцца Еўракубка, то на сайце ФІБА пакуль гасцявы матч ізраільскага калектыву з «Заглембе» з польскага гораду Сасноўца застаецца на сваім месцы і мусіць прайсці 19 кастрычніка.н пройти 19 октября.
Фота: Instagram Ксении Малашко
