Кутузаў пра дагаварныя матчы ў белфутболе: «Самае галоўнае – прыбраць глебу, на якой можа вырасці нешта нелегальнае»
Былы нападаючы зборнай Беларусі Віталь Кутузаў падзяліўся меркаваннем аб справе «Шахцёра».
– Гэта ўжо трэцяя хваля дамоўнякоў у беларускім футболе. Чаму не былі вынесены ўрокі з першых двух? І як у гэтым плане справы ў Італіі?
– Італія, думаю, вынесла ўрокі. Але, мусіць, застаюцца і нейкія сілы, якія спрабуюць уздзейнічаць.
Самае галоўнае – прыбраць глебу, на якой можа вырасці нешта нелегальнае. Тады ўсё будзе нармальна. А інакш нічога не памяняецца. Калі глеба не ўрадлівая, нешта сеяць там няма вялікага сэнсу.
На жаль, у нас гэтая глеба не была прыбраная. Беларускае першынство да гэтага часу захоўвае спрыяльныя ўмовы, каб гэта паўтаралася. Беднасць, слабая арганізацыя, слабы кантроль, недастатковае асвятленне турніру... Дарэчы, гэта таксама важна. Калі аб чэмпіянаце гавораць па ўсім свеце, нешта зрабіць не так лёгка. Калі гэта адбылося ў трэці раз, можа быць і ў чацвёрты, пяты, шосты, дзясяты...
Прычым глеба з'яўляецца менавіта тады, калі каманда не матываваная. І гэта даказвае мой прыклад – гульня "Бары" з "Салернітанай". Так атрымалася, што ў найскладаным чэмпіянаце мы датэрмінова забяспечылі першае месца.
А калі да цябе ў распранальню прыходзяць дзесяць амбалаў і кажуць: Хлопцы, мы ж не можам паехаць і знішчыць нашых сяброў. Ты думаеш, што табе рабіць? Такія сігналы пасылалі ўльтрас са ўсіх бакоў. Мы разумелі, што, калі абгуляем суперніка, з горада не з'едзем. І сем'і будуць у небяспецы. А потым нехта на гэтай гісторыі паспрабаваў нажыцца. У маёй сітуацыі, нажаль, не дапрацавала італьянская федэрацыя.
Падчас размінкі тысяч пяць фанатаў выйшлі на поле абдымацца. І як сябе паводзіць у такой сітуацыі? Банальна ты не адчуваеш сябе абароненым. Выкараніць магчымасць нават дакрануцца да гэтага сёння яшчэ больш важна, чым пакараць кагосьці.
Цяпер фокус на футбалістах. Але, па сутнасці, гэта наёмныя работнікі. І часта менавіта яны трапляюць пад удар грамадскасці. Аднак арганізатар павінен у большай ступені несці адказнасць, чым выканавец. Самае галоўнае – выкараніць арганізацыйны складнік. Часта гульцы становяцца закладнікамі абставін. Іх могуць прымусіць нешта зрабіць. Усякія бываюць гісторыі.
Нават заплаціць штраф для многіх беларускіх футбалістаў – гэта непасільна з улікам заробкаў у краіне. Жадаецца па магчымасці абараніць гульцоў, заставацца гуманным. У рэшце рэшт, гэта звычайныя людзі, а не забойцы. А пасля ўжо кожны павінен атрымаць па заслугах.
– Вас не бянтэжыць, што гісторыя прагрымела менавіта цяпер? Бо, гавораць, тое ж стымуляванне існуе ўжо даўно.
– Мусіць, збольшага бянтэжыць. Бо гэтыя механізмы былі на працягу ўсёй нашай футбольнай гісторыі. Я аб узаемадзеянні кіраўнікоў клубаў. Такія чуткі я ўлоўліваў раней і ўлоўліваю зараз. Можа, учора на гэта заплюшчвалiся вочы, сёння яны расплюшчаны. Значыць, магчыма, нейкім плыням – спартовым, палітычным – гэта выгадна, – сказаў Кутузаў.
Нагадаем, КДК АБФФ разгледзеў інфармацыю, што ў ЧБ-2022 кіраўніцтва «Шахцёра» арганізавала дагаворныя матчы і фінансава стымулявала клубы вышэйшай лігі. У выніку «Шахцёр» быў пазбаўлены залатых медалёў, «Энергетык-БДУ» – сярэбраных. У гэтых клубаў і «Белшыны» таксама знялі ачкі на сезоны 2023 і 2024 гадоў. 30 чалавек атрымалі розныя дыскваліфікацыі і штрафы, але 25 з іх не будуць забаненыя, калі выплацяць прызначаныя сумы. Падрабязней пра справу «Шахцёра» можна даведацца па спасылцы ніжэй.
