Уладзімір Нявінскі: «Яшчэ пазаўчора раніцай не ведаў, дзе канкрэтна будзе праходзіць гульня з «Белшынай»
Галоўны трэнер «Гомеля» Уладзімір Нявінскі падзяліўся меркаваннем пра матч з «Белшынай» (2:0) у 11-м туры чэмпіянату Беларусі.
– Няпростая гульня. Няпросты супернік. Мы рыхтаваліся. Мінулая гульня для суперніка атрымалася няўдалай, але пры гэтым яны забілі 3 мячы «Шахцёру» (3:7). Таму рабілі акцэнт на тое, што ў атацы ў іх індывідуальна-моцныя футбалісты, якім не трэба даць праявіць свае найлепшыя якасці. У нас атрымалася.
У атацы ў нас былі моманты, каб перамагчы буйней. Думаю, перамога заканамерная і па справе.
– Матч быў перанесены з Бабруйска ў Гомель. Вялікая для вас перавага?
– Не бачу ніякай перавагі. Яшчэ пазаўчора не ведаў, дзе канкрэтна будзе праходзіць гульня. Адзінае, што ведаў: мы ў суботу гуляем з «Белшынай» у 15:00. Пазаўчора раніцай было складана спланаваць папярэднюю трэніроўку: дзе і якім чынам. Даведаўся аб пераносе толькі ў другой палове чацвярга. Як разумею, мы проста памяняліся з Бабруйскам правам праводзіць матчы дома.
– Здаецца, былі іншыя варыянты...
– Ведаеце, мне гэта так нецікава. Мне і без гэтага хапае галаўнога болю, – сказаў Нявінскі.