Палякоў з ізраільскага аэрапорта: «Я на пастаяннай сувязі са зборнай, мяне чакаюць у Венгрыі»

Абаронца «Хапаэля» з Хайфы Дзяніс Палякоў быў выкліканы ў зборную Беларусі па футболе, якая 12 кастрычніка ў Венгрыі правядзе матч супраць зборнай Румыніі. Частка авіяперавозчыкаў у сувязі з вайной часова адмовілася ад рэйсаў у Ізраіль. Акрамя таго, у выніку нападаў пацярпеў аэрапорт Бэн-Гурыён у Тэль-Авіве. Палякоў распавёў аб сваім становішчы наступнае.

– Я прама зараз знаходжуся ў аэрапорце. Чакаю рэйса, каб вылецець у Венгрыю і там ужо далучыцца да зборнай.

– Галоўны трэнер зборнай Карлас Алос літаральна сёння выказваў у гэтым няўпэўненасць. Размаўлялі з ім?

– З ім – не. Але я на сталай сувязі з адміністратарам зборнай, які высвятляе, як у мяне справы. Ведаю, што мяне там чакаюць. Так што кантакт ёсць.

– Баявыя дзеянні вас неяк закранулі? Не даводзілася сутыкацца з той жудасцю, якая цяпер у топе стужак навін?

– На шчасце, не. На поўначы краіны ўсё больш-менш спакойна, у тым ліку – у Хайфе. За гэтыя дні не было нават ніводнай трывогі ці чагосьці падобнага, каб намякала на не мірнае жыццё.

– Што вам сказалі ў клубе перад тым, як адпускалі ў зборную? Матчы апошняга туру былі адмененыя. Назад усё роўна чакаюць?

– На самой справе там самі нічога не ведаюць, як усё будзе і што далей. Ды і не толькі ў маёй камандзе не ведаюць. Таму толкам нічога і не казалі, – распавёў Палякоў.

Нагадаем, што з 7 кастрычніка баевікі тэрарыстычнай групоўкі ХАМАС працягваюць атакаваць Ізраіль. Урад апошняга ўпершыню з 1973 года ўвёў ваеннае становішча.