Клубы з Саудаўскай Аравіі плануюць зрабіць Модрычу новую прапанову ўлетку
Клубы з Саудаўскай Аравіі да гэтага часу не адмовіліся ад ідэі запрашэння паўабаронцы «Рэала» Лукі Модрыча, паведамляе AS.
Хоць летась харвату і прапанавалі 300 мільёнаў еўра за тры сезоны, ён без ваганняў адказаў «не», таму што хацеў застацца. І ў Аравіі зразумелі гэтае рашэнне, бо Модрыч легенда мадрыдскага клуба, якая правяла ў ім 12 сезонаў.
Аднак азіяцкі бок не адмовіўся ад сваёй ідэі і плануе ўлетку зрабіць Модрычу новую прапанову, калі скончыцца ягоны дзейны кантракт са «смятанковымі». Дакладныя лічбы пакуль не выдаюцца.
38-гадовы футбаліст выступае за «Рэал» са жніўня 2012 года – за гэты час ён забіў 38 галоў і аддаў 79 дзейсных перадач у 537 матчах.
Падрабязная статыстыка па гэтым сезоне – тут.
Разам з клубам ён пяць разоў выйграваў Лігу чэмпіёнаў, тройчы станавіўся чэмпіёнам Іспаніі і двойчы ўладальнікам кубка краіны.
