Клоп запрасіў Эрыксана стаць галоўным трэнерам «Ліверпуля» на дзень, у Свена быў дыягнаставаны рак у тэрмінальнай стадыі

Галоўны трэнер «Ліверпуля» Юрген Клоп прапанаваў Свену-Ёрану Эрыксану, у якога дыягнаставалі рак у тэрмінальнай стадыі, на адзін дзень узначаліць мерсісайдцаў. Пра гэта паведамляе The Guardian.

75-гадовы швед адзначыў, што хварэе за клуб і заўсёды хацеў яго патрэніраваць, але такой магчымасці так і не ўзнікла падчас яго кар'еры. Разглядалася ідэя, каб ён узначаліў «Ліверпуль» на матч легенд клуба супраць «Аякса» ў сакавіку.

Але Клоп хоча даць яму магчымасць на дзень узначаліць менавіта асноўную каманду.

«Я ўпершыню пачуў пра яго любоў да «Ліверпуля» і пра тое, што ён быў заўзятарам клуба ўсё жыццё. Будзем вельмі рады, калі ён прыедзе да нас і зможа сядзець на маім месцы ў офісе і выконваць маю працу на працягу дня. Калі ён захоча – гэта не праблема.

Мы пакажам яму ўсё, як гэты цудоўны клуб развіваўся многія гады. Я ўпэўнены, што ён зможа прыехаць і правесці тут некалькі выдатных гадзін», – сказаў Клоп.