Ануфрыеў пра мэты на сезон-2024: «Трэба вярнуць БАТЭ на тое месца, дзе гэты клуб павінен быць»

Паўабаронца БАТЭ Аляксандр Ануфрыеў расказаў пра трансфер ў барысаўскі клуб і пра мэты на будучы сезон ЧБ.

Адзначым, што праз дзень пасля падпісання кантракта, 30 студзеня, Ануфрыеў забіў пераможны мяч у спарынгу з «Тарпеда-БелАЗ» (1:0) на турніры «Белазавец-2024». Падрабязная статыстыка гульца тут.

– У нядзелю ты падпісаў кантракт з БАТЭ, у панядзелак ужо забіў. Як настрой?

– Толькі станоўчыя эмоцыі. Я вельмі шчаслівы перайсці ў клуб з вялікай гісторыяй, з найлепшымі заўзятарамі ў краіне. Зараз адчуваю велізарны гонар.

– Перад пераходам ты праходзіў прагляд у «Ленінградцы». Чаму там не зраслося?

– Так, патрэніраваўся з гэтай камандай у Турцыі, правёў спарынг. З'яжджаў туды, ужо маючы варыянт з БАТЭ. І прыйшоў да высновы, што там – не маё. У якім сэнсе? Ну, не той футбол, які мне даспадобы. Як і ў многіх камандах расійскага другога дывізіёна, там упор на фізічную гатоўнасць, шмат беганіны. Таму без асаблівых ваганняў абраў БАТЭ.

– Восем-дзевяць гадоў таму пасля школы БАТЭ ты толкам не змог зайграць у аснове, у чэмпіянаце, напрыклад, наогул не выходзіў. Зараз вяртанне ў Барысаў для цябе закрыццё гештальта?

– Так, ёсць нешта такое, і я вельмі гэтаму рады. Тады гуляў толькі за дубль, а за аснову – у кубкавых матчах. Але ў чэмпіянаце дэбютаваць за БАТЭ не ўдалося. Заваяваць гэтую вышыню тады было вельмі складана, улічваючы на якіх вышынях знаходзілася каманда, і які склад тамака быў сабраны. Спачатку былі арэнды, потым пераход у «Смалявічы». Тым не менш, у мяне выдатныя ўспаміны пра той перыяд.

– Зараз распаўсюджанае меркаванне, што БАТЭ «ўжо ўсё», што каманда садзьмулася, у складзе моладзь, летась не патрапілі ў медалі… Што на гэта скажаш?

– Не, я не лічу, што БАТЭ «ўсё». Ён быў і будзе флагманам беларускага футбола. Гэта клуб, які дабіраўся да вялікіх вышынь на еўраарэне. Так, у апошні час вынікі не такія, як у пачатку-сярэдзіне мінулага дзесяцігоддзі. Але клуб і ігракі працягваюць працаваць. Спадзяюся, у нас атрымаецца іх палепшыць.

– Якім павінен сезон-2024, каб ты яго ацаніў станоўча?

– У плане асабістага, напэўна, буду банальны, але не стаўлю сабе ніякіх планак. Калі казаць пра нейкія мэты, то можна ўсё звесці да аднаго: трэба вярнуць БАТЭ на тое месца, дзе гэты клуб павінен быць. Думаю, усе разумеюць, пра што гаворка, – сказаў Ануфрыеў.