У «Шахцёры» шкадуюць, што з'ехаў, у Мазыры радыя, што прыехаў, а ён хацеў застацца ў Казахстане. Як Ложкін вярнуўся ў ЧБ
Ужо паклаў парачку БАТЭ.
Уладзіслаў Ложкін – адно з галоўных узмацненняў «Славіі» ў зімовае трансфернае акно. 22-гадовы нападнік мінулы год правёў у казахстанскім Д2, куды накіраваўся пасля некалькіх гадоў у мінскім «Дынама». Прычынай сыходу з «Дынама» стала незадаволенасць Ложкіна колькасцю гульнявога часу – у сезоне-2022 ён рэдка праводзіў поўныя сустрэчы, але набраў 6+4 па гол+пас за 25 матчаў. У сталічным клубе былі зацікаўленыя працягнуць супрацу, але Ложкін захацеў змяніць абстаноўку і паехаў у «Туран» з казахстанскага горада Туркестан, які выступаў у міноры, і такім чынам спаліў кампенсацыю за сябе.
За сезон у казахстанскім Д2 легіянер выбіў сур'ёзныя 20+11 за 26 матчаў, стаў найлепшым бамбардзірам каманды, трэцім бамбардзірам лігі і другім яе распасоўшчыкам, чым дапамог «Турану» заваяваць срэбныя медалі і права на павышэнне ў класе.
Па словах Ложкіна, ён хацеў працягнуць выступаць за туркестанцаў ужо ў вышэйшым дывізіёне, але не атрымаў такой прапановы. Гулец тлумачыць гэта зменай клубнага кіраўніцтва.
Як бы там ні было, пасля паспяховага сезона ў «Туране» прапаноў у Ложкіна хапала. Пра цікавасць да нападніка ад розных клубаў паведамляў агент гульца Яўген Мяцеліца, а пасля і сам футбаліст, каментую пераход у «Славію»:
– Было шмат варыянтаў у Беларусі і за межамі краіны, але я абраў Мазыр. Параіўся з трэнерамі, з агентам, абмеркаваў сітуацыю з сям'ёй і вырашыў, што лепш за ўсё мне пасуе «Славія». Тым больш галоўны трэнер тут вельмі амбіцыйны, актыўна развівае футбалістаў. Чаму б не паспрабаваць? – сказаў Ложкін.
Тым не менш у «Славіі» ён аказаўся не адразу. 14 лютага нападнік з'явіўся ў заяўцы «Шахцёра» на спарынг з «Хваляй» (2:0) і адразу вызначыўся забітым мячом. Далей Ложкін працягнуў рыхтавацца да сезона з «гарнякамі», браў удзел у спарынгах супраць брэсцкага «Дынама» (5:3) і «Славіі» (3:3). Сваёй будучай камандзе ён таксама забіў, зраўняўшы лік на 85-й хвіліне, чым дапамог адгуляцца з 0:3 пасля першага тайма.
Нягледзячы на нядрэнныя вынікі ў перадсезонцы, з «гарнякамі» форвард не падпісаўся – усё праз трансферны бан, які АБФФ наклала на «Шахцёр» у кастрычніку мінулага года. Падаецца, што ў Салігорску разлічвалі на зняцце забароны да закрыцця трансфернага акна, але гэтага не адбылося. У выніку Ложкін вырашыў прадоўжыць карʼеру ў «Славіі».
У Мазыры якраз шукалі замену Андрэю Салаўю. Найлепшы футбаліст Беларусі-2021 перайшоў у «Славію» ў студзені гэтага года, а ўжо 24 лютага атрымаў пералом малаберцовай косці ў спарынгу з «Хваляй» (1:1) і выбыў мінімум на два месяцы. Яшчэ адзін фактар пераходу, паводле слоў Ложкіна, абмеркаванне працягу карʼеры з трэнерамі, агентам і сямʼёй. Цікава, што адным са спецыялістаў, які параіў перайсці менавіта да Івана Біёнчыка, быў галоўны трэнер «Шахцёра» Станіслаў Сувораў.
«Улада я разумею – яму не хочацца застацца без клуба. Трэба гуляць. Ён нават раіўся, куды пайсці. Парэкамендаваў яму «Славію». Думаю, усё ў яго ў Мазыры складзецца добра: будзе рабіць тое, што яму скажуць. Хлопец ён неканфліктны», – казаў Сувораў.
Апошняя характарыстыка можа быць ці не найважнейшай для працы з Біёнчыкам. Трэнер вядомы сваім аўтарытарным падыходам да работы з калектывам, з-за чаго не раз узнікалі канфліктныя сітуацыі. Апошняя з іх і самая гучная – з форвардам БАТЭ Андрэем Панюковым.
У мінулую суботу «Славія» правяла спарынг менавіта з барысаўцамі. Панюкоў у заяўку не патрапіў, але падтрымліваў аднаклубнікаў з шалікам на трыбунах:
Затое за «Славію» дэбютаваў Ложкін. Менавіта яго дубль прынёс перамогу мазырчукам 2:0. Пасля матча гульню форварда адзначыў Біёнчык:
«Усе малайцы. Добра дзейнічала група нападу, абарона. Рады, што да нас далучыўся Улад Ложкін. Рады, што ён цяпер гулец «Славіі», – сказаў Біёнчык.
Іншыя пасты карыстальніка
