Экс-трэнер зборнай Беларусі Крываносаў: «Кіраўніцтва белхакея прыняло правільнае рашэнне абраць рускамоўнага трэнера. Думаю, пытанне прызначэння Квартальнава было ўзгодненае самі ведаеце з кім»

Былы трэнер зборнай Беларусі Іван Крываносаў пракаментаваў прызначэнне Дзмітрыя Квартальнава на пасады галоўнага трэнера мінскага «Дынама» і зборнай Беларусі.

Адзначым, у пачатку нулявых Квартальна гуляў у «Ак Барсе», у трэнерскі штаб якога ўваходзіў Крываносаў.

Крываносаў уваходзіў у штаб зборнай Беларусі ў 2002 і 2003 гадах.

– Вельмі добры нападаючы, усюды быў на вядучых ролях. У тым ліку праяўляў лідарскія якасці ў нас у «Ак Барсе». Невыпадкова выступаў у НХЛ. Туды проста так не запрашаюць. І Квартальнаў сапраўды зайграў там. Сам ён з Васкрасенску, адкуль выйшла нямала будучых зорак. Напрыклад, Валера Каменскі, Ігар Ларыёнаў… Школа там добрая.

Як трэнер Квартальнаў таксама ішоў па нарастаючай. Папрацаваў у топавых клубах – «Лакаматыве», ЦСКА, «Ак Барсе». Добры, граматны спецыяліст, які ўжо даволі доўга ў трэнерскай справе. У яго і маладыя праяўлялі сябе, і вопытныя, і ігракі сярэдняга ўзросту. У Беларусі з'явілася шмат перспектыўных хлопчыкаў і дзяўчынак. Думаю, Квартальнаў дапаможа ім «раскруціць майстэрства», як казаў нябожчык Сяргей Аляксеевіч Нікалаеў.

Лічу, у цяперашняй сітуацыі кіраўніцтва беларускага хакея прыняло правільнае рашэнне прызначыць рускамоўнага трэнера, а не замежніка. Усё ж такі на постсавецкай прасторы хапае талковых спецыялістаў, якія чагосьці дабіліся. Той жа Квартальнаў выйграваў, прычым не раз, рэгулярны чэмпіянат з ЦСКА. Хоць ясна, што галоўнай меркай працы зʼяўляецца вынік у плэй-оф. У любым выпадку кіраўніцтву лепш відаць. Думаю, пытанне прызначэння Квартальнава было ўзгодненае самі ведаеце з кім.

– З гульнявымі і трэнерскімі якасцямі новага рулявога «Дынама» разабраліся. Але, так разумею, характар у яго няпросты.

– Скажу так: у большасці хакеістаў высокага палёту складаны характар. Але ёсць выключэнні. Паша Дацюк, Саня Авечкін, Міша Грабоўскі, Максім Афінагенаў, Андрэй Маркаў, з якімі мы працавалі ў чэмпіёнскім маскоўскім «Дынама», – з імі ніколі не было праблем. Што да Дзімкі Квартальнава, то пасля таго як нас «сышлі» з «Ак Барса», мы з ім не перасякаліся да таго часу, пакуль ён сам не стаў трэнерам. Віталіся як калегі, прафесіяналы, але не больш за тое.

– Квартальнаў узначаліў і зборную Беларусі. Адвечнае пытанне: сумяшчальніцтва – гэта добра ці дрэнна?

– У бягучай сітуацыі цяжка адказаць адназначна. Пакуль санкцыі не знімуць, зборная можа праводзіць толькі таварыскія матчы. Але ўсё вызначае рэзультат на афіцыйных турнірах. Ёсць алімпійская кваліфікацыя, чэмпіянат свету… Маючыя адбыцца ў траўні гульні – гэта не той узровень.

Адзіны плюс тут у тым, што ў гэтых спарынгах можна праверыць максімум кандыдатаў, пракруціць усю перспектыўную моладзь. І да таго часу, як адменяць санкцыі, а гэта не працягнецца вечна, трэнер зборнай ужо будзе валодаць інфармацыяй па кожным іграку і ведаць, на каго можна разлічваць. Яму будзе лягчэй вызначыцца са складам, – сказаў Крываносаў.