Дзмітрый Квартальнаў: «Нельга саступаць СКА ў хуткасці, інакш табе створаць вялікія праблемы»
Галоўны трэнер мінскага «Дынама» Дзмітрый Квартальнаў падвёў вынікі супрацьстаяння са СКА (2:1 АТ) у матчы КХЛ.
– Мы гулялі з вельмі добрай камандай. Выдатна, што не далі слабіну. У гэтым сезоне мы вельмі часта прапускаем першымі. Пагаджуся, мы асцярожнічалі, але не магу сказаць, што гэта было вельмі доўга. Праз дзве-тры змены хлопцы ўзялі сябе ў рукі і пачалі гуляць.
– За кошт чаго ўдалося застацца ў тонусе і давесці матч да перамогі пасля неабавязковых выдаленняў у трэцім перыядзе?
– Вельмі шмат збегаў абставінаў. Гуляем з добрай камандай, якая нас змушае гэта рабіць. Чатыроххвіліннае выдаленне мы можам кантраляваць. А вось выкід шайбы – гэта тая энергія і смага Піцера. Сёння нам даў шанец наш галкіпер, ён вельмі выдатна згуляў. У Коласава была тая гульня, у якой ён на сто адсоткаў нас падцягнуў.
– Па тэмпе і мабільнасці ваша каманда не саступіла СКА. Ці сталася гэта ключавым момантам?
– Мы прынялі гэтую гульню, у нас быў такі план. З гэтай камандай нельга саступаць у хуткасці, інакш ты гуляеш другім нумарам, і табе створаць вялікія праблемы. Сёння было вельмі важна патрапіць у хуткасць суперніка.
– Ці казалі вы што-небудзь Іллі Шынкевічу з нагоды эпізоду з падвойным выдаленнем? Нібы яго ззаду штурхалі.
– У такой гульні і з такім лікам мы павінны трымаць эмоцыі. Каманда суперніка вельмі нядрэнна гуляе ў большасці. Трэба было стрымацца. Заўсёды нехта правакуе, нехта якасна правакуе, але мы атрымалі па справе чатыры хвіліны.
– У гэтым сезоне матчы мінскага «Дынама» разбіваюцца на адрэзкі: добрыя і не вельмі. Як прывесці ўсё да агульнага назоўніка, каб была цэласная гульня ўвесь матч?
– Сезон доўгі. У кожнай каманды былі ўзлёты, спады. У нас гуляе шмат беларусаў, якія не маюць досвед выступу ў КХЛ, і нават у ВХЛ. Хлопцы вучацца. У нас ёсць касцяк, каманда будуецца. Мы на правільным шляху, – сказаў Квартальнаў.
