Парэшткі Кальцова збіраюцца даставіць у Мінск. А дзе і як у Беларусі пахавалі іншых вядомых хакеістаў?
Салей, Цыплакоў, Шумідуб.
Былы хакеіст зборнай Беларусі Канстанцін Кальцоў загінуў 18 сакавіка пасля падзення з 23-га паверха атэля ў амерыканскай Фларыдзе. Яго былая жонка Юлія Міхайлава, якая жыве непадалёк ад месца трагедыя, казала, што пахаванне пройдзе ў Мінску. Тады «Трыбуна» распавядала пра тое, як даставіць цела ў Беларусь:
На мінулым тыдні першы трэнер Кальцова Уладзіслаў Астапенка паведаміў, што цела экс-хакеіста крэміравалі, а прах рыхтуюць да перавозу на Радзіму.
Кальцоў – не адзіны вядомы беларускі хакеіст, хто заўчасна пайшоў з жыцця. Успамінаем, як адбывалася пахаванне іншых зорак беларускага хакея.
Руслан Салей
Абаронца загінуў у 36 7 верасня 2011 года ў авіякатастрофе разам з усім складам яраслаўскага «Лакаматыва». На борце былі і іншыя беларусы – форвард Сяргей Астапчук і трэнер па фізпадрыхтоўцы Мікалай Крываносаў.
Цела Салея было дастаўленае катафалкам у Мінск, а выдаткі па арганізацыі пахавання, па словах тагачаснага кіраўніка федэрацыі хакея Яўгена Ворсіна, узялі на сябе ФХБ і хакейны клуб «Юнацтва». Цырымонія развітання праходзіла на арэне «Юнацтва» ў парку Горкага і цягнулася на гадзіну даўжэй, чым планавалася праз вялікую колькасць людзей. Труна з нябожчыкам стаяла зачыненай, а на ёй ляжала гульнявая майка «Анахайма». Побач стаяла ганаровая варта.
З арэны «Юнацтва» труну вынеслі пад гукі аркестра і апладысменты. Для ўсіх ахвочых развітацца з Салеем горад выдзеліў дзясятак аўтобусаў да могілак:
Пахавалі Салея 10 верасня ў Мінску на ганаровай алеі Усходніх могілак.
На гадавіну смерці экс-капітану збіраліся ўстанавіць яшчэ адзін помнік. Знаходзіцца ён павінен быў ці то ля «Чыжоўка-Арэны», ці то ў парку Горкага. У інтэрнэце ёсць фота манумента, але ён дагэтуль не пастаўлены:
Затое гэтай зімой у Оршы насупраць арэны мясцовага «Лакаматыва» на адным з дамоў з'явіўся мурал з выявай легендарнага абаронцы.
Уладзімір Цыплакоў
Экс-нападнік НХЛ сышоў з жыцця 14 снежня 2019-га на 51-м годзе жыцця. Па інфармацыі «Нашай Нівы» прычынай смерці стала самагубства. Пахаванне Цыплакова было вельмі падобным да таго, як хавалі Салея, – развітанне на арэне «Юнацтва» і апошні шлях на Усходнія могілкі. Жалобная цырымонія адбывалася ў прысутнасці ганаровай варты:
Труну апускалі ў магілу пад беларускі гімн і залпы салюту. На надмагільным камяні ляжаць бронзавыя канькі, а яшчэ на ім напісана, за якія каманды гуляў хакеіст.
Аляксандр Шумідуб
Экс-брамнік пайшоў з жыцця на 56-м годзе. У апошнія гады жыцця ён працаваў з галкіперамі ў «Гомелі». У ліпені 2019-га пасля аднаго з трэнінгаў адчуў сябе дрэнна. Шумідуба даставілі ў лякарню, дзе ён упаў у кому, а пазней памёр.
Развітанне праходзіла ў фае гомельскага лядовага палаца. У адрозненне ад цырымоній Салея і Цыплакова, ганаровай варты не было. Тым не менш ахвочых развітацца было нямала:
Труну выносілі пад гукі апладысментаў, а затым транспартавалі ў Мінск. Пахавалі Шумідуба 14 ліпеня 2019-га на Паўночных могілках у Мінску.
Іншыя пасты карыстальніка
